Guardiola-a'n Man City a thleng

Manchester City boss Pep Guardiola chuan Pathianni khan Etihad Stadium a thleng tawh a, Premier League club manager thar hian fans 7,000 hmaah thu sawiin hlawhtlinna chang tur chuan ṭanrual a pawimawh thu a sawi.

Kum 45-a upa Guardiola chuan, "Bar-celona leh Bayern Munich-ah fiahin ka awm tawh a, England-ah hian eng dinhmun nge ka thlen theih tih hriat ka duh, chu chu ka lo kal chhan pawh a ni," a ti.

Ṭanrual a pawimawh thu sawi zuiin, "Keimah chauh chuan hna thawh theih a ni lo a, player, fans, coaching staff-te tel lo chuan hlawhtlin theih a ni lo," tiin a sawi bawk.

Barcelona lama a lo enkawl tawh Lionel Messi chu City lama lakluh a tum leh tum loh an zawhna chhangin Spanish manager chuan, "Messi hi player ṭha tak a ni a, mahse ani hi chu a hun puma Barcelona tana khel tur a ni," tiin Ballon d'Or chawimawina vawi nga dawng tawhtu chungchang a sawi.