Nomawi chawi duhtu Partey

Arsenal midfielder thar Thomas Partey chuan a club chu tun hma lama an ropui tawh ṭhinna ang neih let pui a duh a, manager Mikel Arteta kaihhruaina hnuaiah Premier League nomawi chawi theih a beisei.

Nipui bazar tawp ni khan Gunners hian Atletico Madrid aṭangin pound maktaduai 45 sengin Partey hi an lalut. An ram Ghana tan a inlan zui a, Nilaini aṭang khan North London club tan training a nei ṭan.

Kum 27 mi Partey chuan, "Tu pawhin champion theihna apianga champion chu an duh, kei pawhin nomawi chawi ngei ka duh, chu chu ka thil tum pawh a ni. Champion duh ngawt mah ila thil awlsam a ni dawn lo, kan theihna sang ber kan hlan a ngai ang.

"Chona thar hmachhawn duhin he hmunah hian ka rawn kal a, manager Mikel Arteta leh technical director Edu ten an thil tum leh hmathlir min hrilh khan min hneh, he club tan hian ka theihna zawng zawng ka hlan dawn a ni," a ti.

Arsenal hian league nomawi vawi 13 an chawi tawh a, an champion hnuhnun ber chu 2003-2004 daih tawh kha a ni. Tun season-ah bul an ṭan fuh, match li an khelh tawhah vawi thum an chak. Inrinni zan hian Manchester City an lenchilh ang.