Rosberg aia vannei zawk Hamilton

Pathianni khan F1 Austrian Grand Prix tlan a ni a, Mercedes driver pahnih Lewis Hamilton leh Nico Rosberg te an um tawk a, team khata awm ni mah se a tawpah in tai hialin F1 champion lai Hamilton chu a vannei zawkah a ṭang.

Tun season-a intlansiak vawi kuanaah hian pole position aṭanga tlan ṭan Hamilton-a'n bul a ṭan ṭhain intlansiak tam zawkah hmahruaitu a ni. Mahse, season duhawm tak hmang mektu Rosberg chuan pariatna aṭangin intlansiak bul ṭan mah se insiam ṭhain lap hnuhnung ber an tlan meuh chuan hmahruaitu niin tun season-a a vawi ruk nan hnehna a chang leh ngei dawn niin a lang hman.

Amaherawhchu, lap hnu-hnung berah hian British driver Hamilton chuan German driver hi a rawn tlan pel a, Rosberg-a'n hnehna chan tuma a beih letna lamah Mercedes driver pahnih hi an tai palh hial - Hamilton'an hnehna chang zui thei mah se Rosberg erawh palinaah a thleng hram.

Dutch rawlthar Max Vers-tappen chu pahnihna niin Red Bull driver hian a career-a a vawi hnih nan podium a lawn. Ferrari driver Kimi Raikkonen chu pathumna a ni thung.

A teammate nen an inbakkaih chungchang sawiin Hamilton chuan, "Ka theih tawpa sirah ka tlan a, ka chetsual phah ṭep a ni. Ka tihpalh a nih loh zia a lan ka ring a, thil thlen danah khan ngaihdan nghet tak ka nei a, mah se chu chu sawi chhuah kher a
ṭul lo ang," tiin a ṭawngkamah a lungawi lo tih a hriat theih.

Driver championship-ah Rosberg-a'n point 153 hmuin hma-hruaitu a nih chhunzawm zel a, a hnung chiahah intlansiak hnuhnung palia vawi thum pakhatna ni thei Hamilton awmin point 142 a hmu thung. World champion vawi li ni tawh Sebastian Vettel chuan point 96 a hmu ve tawh bawk.