US Olympic trial-ah Gatlin langsar

Pathianni khan 2016 Rio Olympic a inlan tur United States trail neih a ni a, 100m intlansiakah Justin Gatlin chuan hnehna changin kumin chhunga a tlan ṭhat ber ṭum a tawng.

London Olympic sil-ver medalist Gatlin hian 100m hi 9.80 seconds chhungin a tlan thleng a, kum 20-a upa Trayvon Bromell chu pahnihna niin a vawi khat nan Olympic-ah an ram aiawh turin a tling ve bawk.

Kuminah sprinter ropui tak tak Jimmy Vicaut (9.86 leh 9.88), Jamaica tlangval Usain Bolt (9.88), Qatar sprinter Femi Ogunode (9.91) leh Turkey chhunvawr Jak Ali Harvey (9.92) te chuan 100m ṭha takin an lo tlan tawh - mahse kumin bikah Gatlin (9.80) a la tlan ṭha ber.

A vawi li nana Olym-pic-a inlan tur Gatlin chuan, "Rio-a kal kha ka thil tum hmasa a ni a, tunah chuan a hlawhtling phawt. Ka hmabak chu pakhatna ni tura inbuatsaih leh a ni," tiin Bolt hnunga tlan a tum loh thu a sawi.

Kum 34-a upa Gatlin hian 2015 khan Doha-ah 9.74 seconds chhungin 100m hi a lo tlan thleng tawh a, he a record hi tun thlengin a la tluk leh lo. Rio Olympic-ah hian champion lai Bolt chu rinkai ber ni mah se Gatlin nen hian an in um tawk hle tura ngaih a ni.