Thawnthu chu tihtawpin a awm ta Iceland hmaah France an ropui

Mumang rama cheng Iceland-in Euro 2016 quarterfinal an lut a, France an hmachhawn hmaa an ram chanchinbu lar Fréttablaðið headline chu, "Engtikah tak tawp ang maw?" tih a ni. Pathianni zan khan he zawhna hi chhanin a awm - inelna thlengtu France chuan Iceland hi 5-2 in an sawp a, semifinal-a Germany hmachhawn turin an inpet tling.

Stade de France-a inkhelah chawlhlawk hman a nih meuh chuan France-in 4-0 in hma an hruai tawh a, Olivier Giroud, Paul Pogba, Dimitri Payet leh Antoine Griezmann te chuan goal khat ṭheuh an khung. Second half-ah Iceland-in Kolbeinn Sigthorsson leh Birkir Bjarnason hmangin chhanglet mah se Giroud an goal khat dang a khung leh bawk si avangin Iceland tan beisei tur a awm tawh lo.

Hei le France!

Mahni muala khel France-in ball pet ṭan a nih aṭangin inkhel an thunun a, minute 12 an inkhel hman chauh tihin goal an khung nghal - goal khungtu hi Arsenal striker Olivier Giroud a ni. Minute sarih a liam a, France-in goal dang an khung chhunzawm nghal.

Antoine Griezmann corner pet chu Paul Pogba chuan ṭha takin a tauh lut a, minute 20 pawh an khelh tlin hma hauhin chak tur a chiang titih tawh. Iceland-in theihtawp chhuahin nawr let ṭum ṭhin mah se France player-te thiamna an phak ngang lo a, an che hleithei lo.

Minute 42-na a ni a, Dimitri Payet inlar hun a ni. West Ham playmaker hian yard 20 vela hla aṭangin goal kilah a pet a, Iceland goalkeeper Hannes Halldorsson tan tih theih a awm lo. Minute thum a liam a, Antoine Griezmann chuan player class bik a nihzia pholangin Dutch club NEC keeper Halldorsson ban phak lohah a chip lut a, chawlhlawka France hmahruaina chu 4-0 a ni.

Beidawng duh lo Iceland

First half-a goal li chhuah team tan chak a beiseiawm tawh lo a, team dang tam tak chu Iceland dinhmunah khan ding se an beidawng ngei ang. Mahse, major tournament-a inlan thei ram zinga ram te ber nihna chelhtu Iceland erawh an beidawng ve lo.

Mawi taka ball an inpek kual hnuah Gylfi Sigurdsson chuan France goal bulah ball a vawrh lut a, Nantes striker Kolbeinn Sigthorsson chuan Iceland phurrit chhawk zangkhai turin minute 56-naah a lo tlawh lut. Minute thum a liam hman chauh a, France bawkin goal an khung a, goal khungtu chu Giroud bawk a ni.

France goal luh nana Dimitri Payet freekick pet a ṭhat tluk zetin ball lokal tauh lut tura Giroud-a thiamna hmuh hmaih theih a ni lo bawk. Hun tawp nan minute hnih chiah a awm tawh tihin Birkir Bjarnason chuan goal khat khung ve leh mah se awmzia a nei thui tawh lo a, France an chak.

Inkhelh thiam France

Didier Deschamps-a naute hian Iceland an hmachhawn hmain tun Euro-ah goal hnih chiah an chhuah a, an goal chhuahte hi penalty aṭanga lut ve ve a ni.

Antoine Griezmann-a goal luhna tura France player-te ball inpe kual vel a hmuhnawm hle. Vawi 14 lai ball an in pass kual hnuah Giroud chuan Atletico Madrid forward tan hian mawi takin a lo kian a, Griezmann-a'n tun Euro-a a goal lina khungin top scorer a ni mek.

Goal score aṭanga tehin France hi nuamsa taka chak angin lang mah se Iceland thai bo theih an ni lo. Goal hnih an khung bakah France tlarhnung an chhaih mangang zeuh zeuh a, Jon Dadi Bodvarsson chuan hnai set sawt aṭanga a pet over bakah Sverrir Ingason ball tauh chu France keeper Hugo Lloris-a'n ṭha takin a dang bawk.

Enge an sawi?

France manager Didier Deschamps chuan, "Zanin kan khelh dan avang khan kan lawm takzet a, kan khel ṭha hle a ni. Goal nga kan khung a, goal chhuah ve bawk mah ila nuamti takin kan khel a ni. Inkhelh ṭan tirh aṭangin theihtawp kan chhuah nghal a, hei hi tournament ṭantir lama kan tih theih loh a ni," tiin hma an sawn thu a sawi.

Deschamps chuan Germany nena an inkhel tur thlirlawkin, "Tlarhnung lama kan tihsual kha ennawnin insiamṭhat nan kan hmang ang, khatiang tihsual kha Germany laka kan neih chuan kan tuar lutuk palh ang," a ti.

Iceland co-coach Lars Lagerback chuan, "France hi team ṭha tak an ni a, inkhel ṭantir lamah kha chuan kan tih tur kan hre lo a ni. Second half kan khelh dan erawh a lawmawm takzet a, kan theihna kan pholang a ni. A vawi khat nan Euro kan khel a, quarterfinal kan thlen nghal avangin kan hnathawh hi ka chhuang takzet a ni," tiin an thlen chinah a lawm thu a sawi.

Inkhel leh number

12 : France-in Iceland lakah tlawm hmel an la hmu lo (W9 D3 L0)

17 : France-in major tournament-a an match hnuhnung 17 an rama an khelhah tlawm hmel an la hmu lo.

5 : France-in goal nga an tauh lut tawh a, Euro inelna tournament khata goal tauh lut hnem ber an ni.

4 : Euro match first half-a goal li khung thei hmasa ber chu France an ni.

10 : Olivier Giroud-a'n France tan inkhel bul a ṭan hnuhnung pakuaah goal 10 a khung a, 2016-ah match riat khelin goal sarih a khung.

5 : Iceland-in France goal zawnah vawi nga an pet a, tun Euro-a France hmachhawn tawh team hoin Les Blues goal zawna an pet belhkhawm aiin an pet hnem zawk.

1 : France defender Samuel Umtiti chuan France tana a match hmasa ber major tournament-ah a khel a, Gabriel de Michele-a'n 1966 World Cup-a France tan a match hmasa ber a khelh hnua major tournament-a France tana match hmasa ber khel leh thei awmchhun a ni (keeper tiam loin). Barcelona defender hian vawi 77 pass neiin a ball pet zawng zawng hian a tumna a thleng vek a, Catalan club tana khel turin theihna a nei tih chiang hle.