A bul ṭanna chauh a ni - Iceland captain
Euro 2016-a an match hmasa berah Iceland leh Portugal an inhnehtawk a, chak zo lo thinrim Cristiano Ronaldo chuan defending game kheltu Iceland chu an rilru a huaisen tawk loh avangin group stage an pelh loh tur thu a sawi - mah se Real Madrid forward thusawi dik lohzia chu khawvel hmaah pho chhuahin a awm.
Mipui 330,000 vel lek chenna ram hi kum 2012-ah kha chuan FIFA ranking-ah pawh 132-na an la ni pha ṭawk a, kum li a liam meuh chuan Stade de France-ah Euro thlengtu ram nen quarterfinal an khel! Euro thiam pariat zinga tel tur hian Portugal leh Hungary an inhnehtawkpui a, Austria hnehin last 16 aṭangin England an thawn haw bawk.
Iceland captain Aron Gunnarsson chuan, "France kan hneh loh avangin kan hnual a, chumi rual chiah chuan kan inchhuang em em thung. Tawnhriat ropui tak a ni a, rim taka kan hnathawh rah kan hmu a ni," tiin chak lo mah se a êng zawngin a thlir.
France hmaah Iceland an mualpho a, mah se inkhelh zawh thlengin Iceland fan-ten an player-te an au phur a, hlim takin an zai. Player rorum Gunnarsson meuh pawh a insum zo lo. Cardiff City midfielder chuan, "Inkhel a zo a, kan fan-te kha an la zai reng tho a, a awihawm loh zawk a ni. Zaninah chak lo mah ila, hei hi a bul ṭanna chauh a ni," tiin Iceland chuan hmabak êng tak an neih thu a sawi.
Euro zawh ruala coaching hna chawlhsan tur Lars Lagerback chuan, "Kum li leh a chanve chhungin rim takin kan thawk a, hmasawn zawng hlirin kan kal a ni. Player naupang tak tak an awm avangin he ram hmabka hi a êng hle a ni. Iceland coach hna hi hna awlsam tak a ni a, zinkawng hlimawm tak a ni," tiin inngaitlawm takin an thlen chin chu player-te vanga thleng an nih thu a sawi.
Swansea midfielder Gylfi Sigurdsson chuan, "Player 10 aṭanga 15 vel chu kum naupang tak an la ni a, tunah chuan World Cup lam kan hawi leh tawh ang," a ti. Iceland hian World Cup Russia 2018 khel tur chuan qualifying-ah Croatia, Ukraine, Finland, Turkey leh Kosovo te an paltlang a ngai ang.