Gomez Out - Inhliam vanga buai Germany
Germany-in European Cham-pionship 2016 semifinal thlenpuitu striker Mario Gomez chu Italy an hneh
ṭuma a malpuiah hliam a tawrh avangin inelna neih mekah an chhawr zui thei tawh dawn lo.
Kum 30-a upa Gomez bakah hian midfielder Sami Khedira-a'n malpui hliam vangin France a hmachhawn thei dawn lo a, captain Bastian Schweinsteiger (khup) dinhmun a la chiang lo bawk.
Gomez tel loin
Fiorentina striker season liam taa Turkish club Besiktas tana goal 28 khungtu Gomez hi 2014 FIFA World Cup ṭan hmaa a inhliam avangin Joachim Low kaihhruai champion team-ah a tel lo a, feet ruk leh inches hniha sang striker hi nikum November thlaa France leh Netherlands nen friendly match an khelh ṭumin koh a ni leh chauh.
Euro 2016 ṭantirhah Germany boss Low-a'n Gomez aiin Mario Gotze ring zawk mah se semifinal an thlen meuh chuan striker palian awm lo tur hi channa a ni tawh. Bayern Munich striker hlui hian Northern Ireland lamah chakna goal a khung a, Slovakia an hneh ṭumin goal khat dang khung lehin Italy an khelh ṭuma Mesut Ozil-a'n goal pawimawh a khung theih nan a inrawlh bawk.
Germany hian Gomez chiah hi 'out-and-out' striker an hruai a, Italy an hneh ṭuma khelh dan thar nei Low-a'n France hmachhawn turin khelh dan thar dang a mamawh leh tawh. Kum 56-a upa Low chuan, "Euro-ah Gomez hi kan goal khungtu a ni ringawt lo a, team tana player pawimawh a ni. A inhliam hi kan pawm a ṭul a, kan team tana
ṭha tur thil thar kan duan chhuah a ngai. Chumi tur chuan kan squad a ṭha tawk a, player zawng zawng chungah rinna ka nghat," tiin an insiam rem theih a beisei thu a sawi.
Gomez a awm loh takah chuan inelna ṭantirha an tihdan ang thoin Gotze chungah rinna an nghat leh thei a, khelh dan hmanga Fiorentina striker ang teuh ber Thomas Muller an hmang thei bawk. Amaherawhchu Bayern Munich forward Muller hian Euro 2016 chauh pawh ni loin Euro hrim hrimah goal a la khung lo.
Buaina dang
German boss Low hian Gomez bakah hian Italy an hneh ṭuma yellow card vawi hnihna hmu Mats Hummels an chhawr thei dawn lo. Midfielder Sami Khedira khelh theih loh thu a chiang zui a, Bastian Schweinsteiger pawh a dam chian loh chuan khelhtir an tum lo bawk.
Germany coach Joachim Low chuan, "Khedira-a'n France-a hmachhawn thei dawn lo a, final-a hman theih turin theihtawp kan chhuah ang," tiin a sawi.
Bayern Munich defender thar Hummels thlak turin Benedikt Howedes a hman theih. Schalke captain hian Joshua Kimmich laka a position a hloh hnuah bench ṭangin a la lut ve zel a, match zawng zawngah a la inlan kim vek. Kum 28-a upa Howedes a lut lo a nih pawhin an match hmasa bera Ukraine an hneh ṭuma Hummels aia lut Shkodran Mustafi ala awm bawk.
Juventus midfielder Sami Khedira hian match nga khelh tawhah vawi khat chiah a la khel tluan a, Real Madrid midfielder vawi li thlaktu chu chu captain Schweinsteiger a ni. Manchester United mifielder hi a inhliam leh bawk si chuan kum 20-a upa Julian Weigl chungah rinna an nghah a ṭul ang. Borussia Dortmund midfielder hian Euro 2016 qualifier emaw inlena takah pawh a la inlan lo a, Germany tan chuan vawi khat a khel ve tawh. Weigl bakah hian Liverpool midfielder Emre Can chu chhawr theihin a awm bawk.