MS, i dawn chiang em?

Kumhlui Vawkhniakzawn Thla, tahrik 10 chawhnu boruak uap deuh churh kara India-in World Cup semifinal-a New Zealand in hmachhawn ṭum khan kan va ṭang em. Champion ngei tumin inbei a, kum 14 leh thla 6 leh ni 17 rinawm taka phunnawi miah loa i lo tih ṭhin kha India mipui tluklehdingawn chuang khan, khami tum pawh khan i hlen chhuah leh mai kan lo ring a. I din chhung kha chuan kan thla a muang.

Mahse famkim lohna khawvelah hian Pathian ang tlukah he India mipui hian chhal ṭhin mah che se la, mihring sakruang nei, pian ni leh tawp ni nei ve tho Dhoni-a i ni tih khawvelin a pawm ve thei chiah che. Martin Guptill-a'n dangdai lutuka a run out che avanga, centimeter khat leka India World Cup final i thlenpui zawh loh avanga, dressing room pan tura i hrehawm hmel pu leh i chhing mittui hnam kalh kalh kha khawvelin kan la hmu ngai lo. Dhoni-a meuh pawhin emotion i lo nei a ni tih he Zoram kilkhawr aṭang hian kan hriat vena chiah a ni.

Second hnuhnung ber buzzer rik hma chiah a, chakna basket team tana a thun ṭhin kha Michael Jordan-a ropui danglamna tehfung pakhat a nih chuan, khami ṭum khan Michael Jordan chu i tling pha lo. Mahse, Dhoni pakhat chauh an awm a, an awm leh tawh ngai hek lovang.

International chu i lo thlahliam ta a. Mahse khawvelin IPL hmangin hun rei lote chu kan la hmu thei tur che te hi, i hlutna tizualtu a ni. IPL pawh hi kum tam chu i khel tawh dawn lo tih a chiang. Hei i chanchin phak ang tawka ka buatsaih lai mekin, i khelhpuiten, Dubai-a IPL khel tur in pan dawn a, economy class-a chuang tu tih i hriat loh, thlawhna chuan chhung a rei dawn si a, kha pa bawp sei tak, hrehawm taka inhnawh lut kha inthlawhtheihna chuanna Business Class i ṭhutna tur nen i thlengpui thu leh thlalak tharlam deuh te ka dawn zel 

hi maw.

India captain i nih tirhin, travelling dress-a blazer leh formal hak ṭup ngai ṭhin chu i duhdan ni loin, polo shirt smart pangngai takin fashion i thlak a. A hnu zelah international chu sawi loh, 1st class cricket ho pawhin i hnung kan zui zel. Khawvela celebrity culture kan intihhmuha, twitter leh instagram vela zuitu inngahsiakna hmunah nang a lar ber tur te hian, interview mumal vawiin thlenga media ho i pek sawi tur pawh hi a la awm lo. 

World Cup 2011-in champion hnuah in brand value nasa takin a invawrh avangin, nangmah enkawltu Firm chuan Vaibelchhe za tam taka i contract tihpun an tum lahin, nang lah chuan, champion lo ila, ka hlutna hi a tla hniam dawn tihna em ni, eng nge kan champion avanga san tak vak kher tia chhangletin, i contract ngai  chiahah chuan i lungawi mai a. Infiammite khawsak dan tur mai piah lamah mihringte he khawvela rei lote kan cham chhunga awm dan tur dik hi chu he khawvel hi i kawhmuh ve chiang a ni.

Kum 2007-a thla nga chhung leka Dhoni nuna thil thleng hian a cricket zinkawng chu a sawifiah mai awm e . Kumtir lama mualpho taka World Cup group stage pawh paltlang thei loa an rawn haw 

ṭum khan, fans thinrim za tam takin Ranchi-a a  in leh lo chu lung leh anchhia chi tinrengin an lo tawng a.

Police ṭhahnem tak venhim ngai khawpin an awm. A hnu favang a lo inher a, World Cup T20-a an champion lah chuan, fans sang tam takin a in kawtah chuan chawimawi tumin darkar 24 chhung nitin deuh tho chu an bawrbuai leh. Hetah hian Dhoni chuan, "Infiammi kan ni a, he khelmual chhunga thil thleng hi khawvelin min hriat dan a ni tur a ni lo" a ti sam et mai a ni.

Awle, tunah chuan, IPL bak khelh tur a nei ta bik lo. Hun thawl leh thawveng zawk pawh a ngah ngei tawh ang. Nuam a tih em em Rajdoot bike khalh a, Ranchi khawlai vela a hun awla lim puat puat turin duhsakna kan hlan e. Salute Lt Colonel Mahendra Singh Dhoni. I ram tan i theihtawp i chhuah e.