Zanin dar 7:30-ah FA Community Shield : Manchester City Vs Manchester United

Euro 2024 leh Paris Olympic a awm avangin nipui chawlh a lang rei lo. Zanin dar 7:30 hian Premier League khuhhawnna atana neih ṭhin FA Community Shield chu khelh a ni dawn. Wembley Stadium-ah Premier League champion Manchester City leh FA Cup champion Manchester United te an inkhel ang.

Community Shield hi Sony Ten 1, Sony Ten 1 HD leh Sony Liv hmangin a en theih ang.

City dinhmun chu

Pep Guardiola hote hi Premier League-ah a zawnin vawi li an champion tawh a, vawi nga champion thei dinhmunah ding mah se Man City meuh pawh an nghet ta bik lo. Nipui transfer-ah an player duh lai Julian Alvarez an chân dawn a, Argentine forward thlak hi a harsa ang.

Man City hian season liam ta match hnuhnung berah Man United chu FA Cup final-ah 2-1 in an hneh lo. Tun season inpuahchahna atana friendly match hmasa pathumah City hi an chak lo vek.

Pep-a hote hian Celtic (3-4), Milan (2-3) leh Barcelona (2-2, Pen 1-4) te an hneh lo a, chutihrualin match hnuhnung berah erawh Chelsea 4-2 in an hneh thung.

City hian Alvarez an chan dawn a, goalkeeper Ederson hmalam hun a chiang lo. Brazilian goalkeeper Ederson hi cham dawn pawh ni se, zaninah erawh hliam vangin a inlan a rinawm loh.

Euro 2024-ah Spain an champion a, best player-ah Rodri thlan ni mah se final-ah Spanish midfielder hi hliam vanga lakchhuah a ni. Community Shield-ah Rodri bakah Rico Lewis dinhmun a chiang lo.

Man City hian Premier League thunun mah se Community Shield erawh an ngai pawimawh tawk loah a ngaih theih a, inelna hnuhnung pathumah an chak lo vek.

Mahse maw...

Pep-a hote hi tlahniam deuhin lang mah se an goal khung khawl Erling Haaland-a'n Euro C'ship a khel ve lo a, inelna hmachhawn turin a inpeih. Norwegian striker hian friendly match-ah goal nga a khung a, Man United tlarhnung tan buaipui tham a tling dawn.

Gareth Southgate-a'n England squad aṭangin Jack Grealish a paih a, English winger hian pawm har a ti - Grealish ṭha zawk hmuh theih a rinawm. Pep-a'n Community Shield hi player naupang zawk Oscar Bobb leh James McAtee te chhawrna remchangah a hmang thei a, Bobb leh McAtee te hian theihna an nei sang ve ve.

City-ah Kevin de Bruyne a la cham dawn a, Haaland a awm bawk avangin attacking lam chu a ngaihtuahawm loh. Tlarhnungah Rico Lewis a inhliam chuan training la zawm rei lo mah se Kyle Walker a awm thei ang a, mual laiah Ruben Dias leh Manuel Akanji te inkawpin mual vei lamah Josko Gvardiola awm thei. Goalkeeper-ah Premier League nomawi an chawi theih nana Son Heung-min-a pet dangtu Stefan Ortega a awm a, Man United laka zam tur an ni lo.

Man United thar

Man United-in FA Cup final-a City an hneh zawhah Erik Ten Hag-a hmalam hun an tichiang mai lo a, club hotuten Dutch manager hi an duh khawp lo emaw ni le, tih theih turin thutlukna an siam tlai. Chutihrualin club hotuten manager atana Ten Hag an rin nawn hnuah erawh an thlawp ṭha a, coaching staff ṭha bakah player ṭha an laksak.

Mahse, Man United thar din tum Ten Hag-a'n team thar a la din rih dawn lo. Friendly match-ah Rasmus Hojlund leh defender thar Leny Yoro te an inhliam a, an chawlh rih a ṭul dawn. United ṭantuten team thar beisei mah se team hlui bawk an nih a la ṭul ang.

Yoro inhliam bakah Harry Maguire leh Victor Lindelof te dinhmun a la chian loh avangin kum 36 mi Jonny Evans-a'n bul a ṭan leh mai a rinawm a, Copa America nomawi chawi hlim Lisandro Martinez nen an inkawp a rinawm. Argentine defender hi Copa America vangin friendly match-ah a inlan lo.

Friendly match-ah United rawlthar Harry Amass a khel ṭha a, mahse Community Shield-ah meuh chuan kum 17 mi ai chuan tawnhriat nei ṭha Luke Shaw a inlan tur ngaih a ni. Man United-in Aaron Wan-Bissaka thlak nan Noussair Mazraoui lak an tum nia sawi a ni a, Diogo Dalot-a'n bul a ṭan a nih pawhin a mak lo ang.

Man United buaina chu defensive midfielder a ni a, Real Madrid aṭanga beiseina sang tak nena an lakluh Casemiro-a'n beisei a pha lo. City ang thoin United hi friendly match-ah an che chhia a, Brazilian midfielder hi mawhphurtu zinga mi a ni.

Chutihrualin thlakna tur a awm chuang loh avangin Ten Hag-a'n Casemiro hi a chhawr mai a rinawm a, Kobbie Mainoo nen inkawp tura ngaih an ni. Mual sirah Amad Diallo leh Marcus Rashford te an awm thei a, Alejandro Garnacho pawh bench aṭanga lut turin a inpeih ang.

Hojlund a awm dawn loh avangin a aiawh tur Ten Hag-a'n a dap a ṭul dawn a, friendly match-ah Jadon Sancho a chhawr avangin English winger hi striker-a inlan thei a ni. Chutihrualin player thar Joshua Zirkzee-a'n training a zawm tawh a, Dutch striker hi bul ṭan thei a ni bawk.

Man United-in FA Cup final-a an hneh City hneh nawn tumin Wembley Stadium an pan dawn a, bench-ah Ruud van Nistelrooy a ṭhu dawn. Netherlands striker hlui hi player a ni tawh lo a, assistant manager a ni tawh thung ang.