AFC ngam lotu Police dinhmun a derthawng

GIG Motors I Day Football-ah I League club Aizawl FC-in semifinal an lut a, NorthEast United reserves an tla - hmunruak pakhat hi Mizoram Police, Chawpui FC leh FC Bethlehem te an inchuh dawn.

Nimin khan Aizawl FC-in MPL11-a an sawp tawh Police chu 2-0 in an hneh nawn. Inkhel dangah Chawnpui FC-in semifinal beiseina nei turin NorthEast United 3-1 in an hneh a, ISL reserves team tan beisei tur a awm tawh lo.

Vawiin hian group B te hian group match hnuhnung ber an khel dawn. Chhun dar 12:00-ah Chawnpui FC leh Mizoram Police FC te an inkhel dawn a, tlai dar 3:30-ah NorthEast United leh FC Bethlehem te an inkhel ang.

Chawnpui Par

I Day Football-ah Chawnpui FC-in par an chhuah ta a, nimin khan state pawn aṭanga chahluh NorthEast United reserves chu 3-1 in an sawp. NE United player Robin Chettri-in an lamah an ti lut a, Lalchhanchhuaha leh Benjamin Lupheng ten Chawnpui tan an khung belh.

Chawnpuiin goal thum an khung hnuah NE United mualpho hliah khuhna goal an khung a, minute 88-naah Dallalmuon Gangte-in siphurh a sut ṭhen. MPL9 champion Chawnpuiin MPL leh I Day Football-ah result an nei ṭha tawk lo a, tun ṭuma an result hian phurna a pe ang.

AFC an ṭha

Group of death tia hminglem pek, group A-ah Aizawl FC-in harsatna an tawk lo a, an khingpui an hneh vek bakah goal chhuah loin pakhatnaah an awm. I League club hian nimin khan group match hnuhnung berah C. Lalhriatpuia goal hnih hmangin Mizoram Police 2-0 in an hneh.

Aizawl FC tan winger-te an che ṭha a, goal hmaah an striker-te an hriam tawk lo. Nimin inkhelah erawh C. Hriata'n hun rei lote chhungin goal hnih a khung a, Police an talbuai phah. Farkawn tlangval hian box chhunga indirect freekick hmangin hattrick siamna remchang a nei a, a hun ṭha neih a bawhpelh thung.

I League club hian semifinal-ah Ramhlun Athletic FC an hmachhawn dawn a, Victor Lalbiakmawia hote hi season liam ta final-ah chesual a, kuminah champion ngei an tum tawh ang.

A hmuhnawn dawn

Police-in Aizawl FC lakah bul ṭan chhe lo mah se defender tihsual an tuar a, point an hmuh loh avangin tla thei dinhmunah an ding. Chutihrualin Lalbiaksanga Colney hote tan semifinal lut turin Chawnpui laka point khat hmuh a tawk a, an chak loh pawhin FC Bethlehem chak dan a zirin knockout stage an lut thei bawk.

Chawnpui tan erawh semifinal lut turin chak ngei ngei a ngai a, Police laka chak turin inrintawkna an nei bawk ang. Chawnpui an chak hian FC Bethlehem tan semifinal luhna kawng a inhawng ve bawk dawn. Lalhriatpuia Sailo hote hian Chawnpui an hneh tawh avangin NorthEast United an hneh chuan semifinal an lut thei ang.