India leh Neeraj Chopra tan silver medal

Paris Olympic 2024 atana India medal beisei sanna ber tia chhal ngam Neeraj Chopra chuan silver medal a khawh chhuak. Olympic champion lai hi men's javelin throw huangah pahnihna a ni.

Pakistan tlangval Arshad Nadeem chu pakhatna a ni thung. Nadeem-a hian 92.97m tehmeuh a thui khawhin Olympic record thar a siam a, pahnihna Neeraj (89.45m) aiin 3.52m in a khawh thui zawk.

Olympic gold medal pakhat chauh lak pawh a harsa, a harsatzia chu India dinhmun aṭangin a chiang. Neeraj hian qualifying neih laiin a khawh thui ber a, a lakah beiseina a san zual phah hle.

Mahse, inelna tak an neih hmain India tlangval hian chetsual theih a la ni tih a sawi a, thli thawt dan leh ke chheh pakhat lek tihsual vang pawha medal lak loh theih a nih thu a sawi bawk, a ṭawng fimkhur hle a ni.

Ningani zanlai khan inelna tak an hmachhawn ta ngei a - Olympic hmasa lama Neeraj-a elpui Arshad Nadeem chuan a khawh vawi hnihnaah 92.97m a thui a khawh a, hei hi midang tan elphak a ni lo - Olympic record a ni.

Olympic hnuhnung zawkah khan Neeraj leh Nadeem te bawk hi na takin an lo inel tawh - India tlangval a chungnung zawk, tun ṭumah erawh Pakistan tlangvalin dinhmun sang zawk a rawn luah ve ta thung.

Champion ta chiah lo mah se Neeraj hian mellung pawimawh a phun tho. India infiammi zingah Olympic vawi hniha medal la thei pangana a ni - Norman Pritchard, Sushil Kumar, PV Sindhu leh Manu Bhaker te huangah a lut ta chiah.

Olympic final round fei khawhah hian vawi nga an khawh thei a, chumi zinga a ṭha ber chu an hmang ṭhin. Pakistan tlangval hian a hnuhnung berah pawh 91.79m a thui a la khawh tho a, a khawh thui lawk zawk pawh hi Olympic champion nih nan a tawk zo tho bawk a ni.

Tun hma lama Olympic record lo siam hmasa tawhtu chu Andreas Thorkildsen kha niin, Norway infiammi hian Beijing 2008-ah khan 90.57m a lo khawh tawh, tun ṭumah Arshad Nadeem-a hian a rawn khum leh ta chiah.

Barcelona 1992 hnuah Pakistan hian Olympic medal an la ve leh ta chiah a, an rammi infiammi zingah Olympic gold medal la thei hmasa ber a ni bawk a, an ram tan chuan fapa rangkachak a ni chiang hle.

Neeraj Chopra thukhawchang

"Arshad Nadeem khan a khawh ṭha em em a, hlawhtlinna a chanah ka lawmpui takzet. Ani nen hian kum 2016 aṭang khan kan inel tawh a, kan pahnih bika kan intihsiak dun tawhnaah tun ṭum hi a sang zawk a nih vawi khatna a ni.

"Hliam tenau ka nei a, chuti chung chuan ka ṭhat dan bera beih ngei kha ka tumruh hle. Ka theihtawp chhuahin ka khawh ṭha hleah pawh ka ngai a, chutihrualin keimaha a ṭha ber a chhuak zo ta lo kha a pawi ka ti hle.

"Metre 90 a thui hi ka la khawh ngai lo, vawi hnih ka khawhnaah khan tun ṭum chu tun hma lama ka la tih theih ngai loh ti ngei teh ang tiin rilru ka siam a, inrintawkna leh beiseina sang tak nen fei ka khawh.

"Tun ṭumah hian mellung ṭha ber phun thei rih lo mah ila, engtik niah emaw chuan ka tum ram ka la thleng leh ngei ang. Chutihrualin kan ram tan Olympic medal la hlawhchhuak leh ta, hei chu ka ngai hlu hle a ni," a ti.

Tokyo Olympic gold medalist hi Asian Games champion lai a ni bawk a, mahse tun hnai kum thum chhung chu hliam neuh neuh a nei fo, hei vang hian duhthusam anga ṭhain Paris Olympic atan hian a inbuatsaih ṭha tawk lo niin a lang.

Kum 26 mi Neeraj Chopra chuan, "Tun hnai kum hnih vel chu ka tan a harsa, ka khel bawr hliam vangin ka chawl fo. A theih leh rem ang angin training chu nei mah ila fei ka khawh tam tawk lo, tun hi ka tawpna tur erawh a ni lo," tiin beisei a la neih thu a sawi.