Lyles hmaah Letsile Tebogo

Paris Olympic mipa 200m intlansiakah Letsile Tebogo a tlan chak ber - Botswana sprinter hi 100m intlansiaka pakhatna Noah Lyles (bronze medal) leh Kenneth Bednarek (silver medal) te hmaah a thleng.

Kum 21 mi Tebogo hian 200m tlan thleng tur hian second 19.46 hun a hmang a, pahnihna American tlangval Kenneth Bednarek hi second 19.62 chhungin a thleng thung a ni.

Beiseina sang tak nena inlan Lyles chuan second 19.70 a hmang thung - Usian Bolt anga 100m leh 200m intlansiaka Olympic gold medal la kawp thei nih a tumna chu a thamral leh ta rih a ni.

Tebogo hian an ram Botswana tan hun chhinchhiah tlak a hnutchhiah, an ram tana Olympic gold medal la thei hmasa ber a ni. A gold medal lak hi kumin May thla maia boral ta a nu Elizabeth Seratiwa tan a hlan.

Olympic champion Tebogo chuan, "Ka nu kha la dam ni se la chuan khawvela mi hlim ber a ni ngei ang. Keimah ngei pawh ka in rin zawh loh laiin ka nu kha chuan min ring ngam a, Olympic champion ka nih theih ring tlattu kha a ni," a ti.