Spain hnehtu India pathumna

Indian Men's Hockey Team chuan mellung ṭha tak an phun - Olympic bronze medal a zawnin an la. India tlangval te hian Spain 2-1 a hnehin Paris Olympic 2024 neih laiah pathumna dinhmun an luah.

Ningani zan Yves du Manoir Stadium-a pathumna inchuhah India tan captain Harmanpreet Singh goal goal hnih (30', 33') a khung a, an khingpui Spain lamin goal khatin chhanglet ve mah se goal dang a luh belh tawh lo.

Indian skipper Harmanpreet Singh hian Paris Olympic-ah hian goal 10 a khung a, a khung tam ber. A goal khung zinga pasarih chu penalty corner aṭangin a ni a, a dang pathum chu penalty strokes aṭangin a ni thung.

India mipa hockey team hian Olympic medal 13 an vaw chhuak tawh, a hmasa ber chu kum 1928 kha niin an champion. Khawvel huap infiamna lianah hian vawi riat champion tawhin, sulhnu an nei ṭha hle.

Hockey India chuan India tana bronze medal latu player zawng zawng te hi, mimal tin Rs 7,50,000 a oek vek tur thu a puang ngal. Indian Olympic Committee bakah hmun dang aṭangin hanṭhatna hrang hrang an dawng bawk ang.

Paris Olympic mipa hockey-ah bik chuan Netherlands an champion. Dutch team hi an khingpui Germany nen 1-1 in an inhnehtawk a, penalty thai niin Netherlands hi 3-1 a chakin gold medal an dawng.