Pepe-a'n inkhelh a chawlhsan ve ta

Kum 41 mi Pepe chuan inkhelh a chawlhsan thu a puang ve ta. Portugal legend hian minute 33 zeta sei video chu ama YouTube channel, Pepe Ferreira-ah tarlangin, inkhel a chawlhsan thu hi a puang.

Kum 41 mi defender hi season tharah chuan kan hmu dawn tawh lo tihna a ni a, Euro 2024 quarterfinal-a France an ngam loh chu Portuguese defender tan a match hnuhnung ber a ni zui ta a ni.

Pepe hian kum 41 hial tlingin inkhelh chawlhsan mah se, a hun tawp thlengin Portugal tan player pawimawh a ni a, football khawvela nomawi chawi theih langsar chu a chawi deuh vek - a sulhnu a hraw hle.

Ka lawm e

Pepe chuan, "Ka chunga rinna nghattu, club President zawng zawngte chungah lawmthu ka sawi a, ka lo khelh tawhna club-a hnathawk zawng zawngte chungah ka lawm - club leh ram team khaidingtu leh a nihna tak pholangtu chu nangni hi in ni e.

"Lang lo lama min thlawptute zawng zawng chungah pawh lawmthu ka sawi a, in zavai chunga ka lawmna hi a sang em em a ni," a ti a, player a nih chhung zawnga a thawhpuite a hre reng.

Pepe hian Portuguese club Maritimo-ah a professional zinkawng zawh ṭanin, FC Porto, Real Madrid leh Besiktas tan a khel hman a, heng club pangate tan hian match 742 khelhsakin, goal 42 a khung.

Sulhnu ropui

Pepe hian a vanglai hun ropui ber chu Real Madrid tan a hmang a, Spanish club tan hian season 10 zet khelin, match 334-ah goal 15 khungin, assist vawi 20 a nei a, nomawi 13 a chawi hman!

Real tan hian La Liga (3), Copa del Rey (2), Supercopa de Espana (2), Champions League (3), UEFA Super Cup (1) leh FIFA Club World Cup (2) nomawi a chawi hman a, Real tan hian champion theihna zawng zawngah a champion tiin a sawi theih.

Pepe hian Porto tan pawh nomawi a chawi nual a, Primeira Liga (4), Taca de Portugal (5), Taca da Liga (1), Supertaça Cândido de Oliveira (3) leh Intercontinental Cup (1) ah te champion nomawi a chawi vek a ni.

Ram tan

Pepe hi ram tan pawh a sulhnu a ropui hle. Portugal tan match 141 khelin goal riat a khung a, kum 2016 khan UEFA European Championship-ah nomawi chawiin, kum 2019 khan UEFA Nations League nomawi a chawi bawk.

UEFA European Championship Team of the Tournament-ah vawi thum ngawt a lang thei a, kum 2016-a an champion ṭum hian final-a a khelh ṭhat em avangin final man of the match atan thlan a ni hial.

Portugal tana inlan hnem lamah hian a ṭhianpa Cristiano Ronaldo (212) leh Joao Moutinho (146) chiah a tluk lo a, Brazil-a piang leh seilian ni mah se, Portugal tana inlan hi thlang zawkin, a tisual lo.

Mangṭha ṭhianpa

Portugal leh Real Madrid tana Pepe khelhpui ṭhin, mi tam takin footballer ropui ber ang hiala an chhal Cristiano Ronaldo chuan a ṭhianpa hi a thlah ve bawk a, a tana Pepe hlutna chu thua sawifiah chi rual a nih loh thu a sawi.

Ronaldo chuan, "Khelmual chhunga champion theihnaah chuan kan champion dun vek a, mahse, chung zawng zawng ai pawha ka ngaihhlut zawk chu nang nena kan inṭhianṭhatna leh ka zahna che hi a ni. I chungah ka lawm e," tiin a ṭhianpa hi a thlah.

Al Nassr forward Ronaldo pawh hi kum 39 mi ni ve tawhin, inkhelh chawlhsan a hlat tawh bik lo. Manchester United aṭanga hming chher forward hian Portugal tan match 212 a khelhah goal 130 a khung a, Pepe nen an ṭhian dunin, Real Madrid-ah an vanglai an hmang a, team ṭha zinga Portugal hlangkaitu langsar an ni.