Newcastle-in striker thar Osula an nei

Premier League club Newcastle United chuan Sheffield United striker William Osula an la lut a, a man atan hian pound maktaduai 15 an seng - a contract rei zawng hi tarlan a awm lo.

Kum 21 mi striker hian Sheffield tan match 31-ah goal thum khungin, season hmasa khan Premier League match 21 a khel a, goal a khung miah lo - a sulhnu ropui lo mah se, a kum zat ngaihtuahin, Magpies hian risk an la ngam niin a lang.

Osula chuan, "Newcastle hi club lian leh ropui tak a ni a, ka zawm thei hi ka lawm hle. Magpies-in min duh tih ka hriat rual khan khaw dang ka hawi thei tawh lo a ni," a ti a, Newcastle manager Eddie Howe chuan an striker thar chu kum thum zet an lo enthlak tawh thu a sawi.

Howe chuan, "Ka assistant manager Jason Tindall-a'n Sheffield-a hun a hman lai khan Osula hi ka hre daih tawh. Kum thum chhung kan en thla a, kan duh zawng tak a ni. Centre-forward ṭha tak ni tura theihna sang tak nei a ni," a ti.

Newcastle hian nipuiah player paruk la lut tawhin, Osula hma hian Miodrag Pivas, Odysseas Vlachodimos, John Ruddy, Lloyd Kelly leh Lewis Hall te chu an lo la lut tawh.