UAE lamah Zouma a kal dawn

West Ham United captain Kurt Zouma chuan United Arab Emirates lam a pan hnai a, UAE Pro League club Shabab Al-Ahli nen an indawr mek - he thuziak i chhiar meuh chuan an in la lut fel tawh hial mai thei.

Kum 29 mi defender hi West Ham-ah player hlawh hnem pawl niin, kar khatah £125,000 a hlawh nia sawi a ni a, coach thar Julen Lopetegui hnuaia indinthar mek Hammers hian an squad tihthawl a, budget siamrem nan chhuahtir hi an hnial lo.

Zouma hian kum 2021 khan Chelsea aṭangin Hammers hi pound maktaduai 29-in a zawm a, season hmasa ṭan dawna Declan Rice an hralh avangin coach David Moyes chuan club captain-ah a ruat zui.

Mahse, captain ni chunga season khat a khelh hnuah UAE lam a pan dawn. French defender hian Hammers tan inelna hrang hrangah match 103 khel hmanin goal ruk a khung a, assist vawi khat neiin, 2022-23 season khan Europa Conference League-ah a champion pui.