De Gea leh Fiorentina an indawr

Manchester United goalkeeper hlui David de Gea chu club nei loa a awm reng hnuin Fiorentina nen an inhnimhnai ṭan ve leh ta a, Spanish keeper hian season tharah Serie A club tan a khel a nih pawhin a mak lo ang.

Kum 33 mi keeper hi season hmasa khan United-ah a contract a zo a, club dang nei zui mai tura ngaih a nih laiin season khat ngawt inkhel loin hun a hmang - hetih chhung zawng hian training erawh a nei reng tho.

De Gea hian hlawh a phut hnem hret ṭhin nia sawi a ni a, Genoa nen pawh inrem hman ṭep mah se a hlawh duh san luat avangin an inrem thei lo. United-ah khan kar khatah £3,75,000 a hlawh nia sawi a ni. Fiorentina nen an indawr leh ta a, he thu buatsaih a nih lai hi chuan inremna an la nei rih lo.

Fiorentina neitu hi sumdawng hausa Rocco Commisso niin, a hausakna hi dollar tluklehdingawn sarih chuang a ni a, Spanish keeper a duh tak tak leh tak tak lohah De Gea hma hun a innghat thui viau ang.

Kum 2001 khan Fiorentina hian Coppa Italia nomawi chawiin, hemi hnuah champion nomawi langsar chawi an nei leh tawh lo - tun hnaiah season hnih chu a zawnin Europa Conference League final an khel a, a chak lo zawkah an ṭang ve ve.