CAF hruaitu hlun Issa Hayatou a thi

Confederation of African Football president hlun Issa Hayatou chu kum 77 mi niin a thi a, Cameroon lam mi Hayatou hi kum 29 zet chu CAF President a ni a, 1988 khan he dinhmun hi chelh ṭanin, kum 2017 thleng khan a ni thei.

Hayatou hian FIFA-ah pawh hmun pawimawh chang ṭhinin, 1990 -2017 inkar kha FIFA Council-ah member a ni a, 2015-16 inkara FIFA president Sepp Blatter hrem a nih khan President lailawk hna a lo chelh tawh bawk.

FIFA president Gianni Infantino chuan a vanglaia basketballer ni ṭhin Hayatou chu thlahin, "Hayatou chanchinin min ṭhawng hle. A hun zawng zawng infiamna khawvel tan a hlan a, FIFA aiawhin a chhungte leh amah hnaihtute tawrhpuina ka hlan a ni. Thlamuangin chawl ang che," a ti.

August 2021 khan FIFA chuan Hayatou hi African football-a sum tamna ber, French media company Lagardere nena inremna chungchangah thiam loh chantirin, kum khat atan a lo hrem tawh a, mahse, February 2022-ah Court of Arbitration for Sport (CAS) chuan a hlip.