Saudi-ah Richarlison a kal duh lo

Tottenham Hotspur striker Richarlison chuan Saudi Arabia aṭangin sawmna hmu mah se a hnar a, Brazilian forward hian London club-a cham a duh thu a sawi.

Kum 27 mi Richarlison hian kum 2022 khan Everton aṭangin Spurs hi a zawm a, a man zat hi pound maktaduai 60 niin, London club-in player an lei man to ber record a siam.

Mahse, Richarlison hian khelh ṭhat chang nei mah se, Spurs-ah beisei angin a khel chhuak lo. Match 66 a khelhsak tawhah goal 15 khungin, assist vawi riat a nei a, a man nena teh chuan a ropui tawk lo.

Spurs coach Ange Postecoglou chuan striker thar an zawn mek thu a lo sawi tawh a, Richarlison hi season hman zawh takah pawh khan rin berah a nei ngam lo - hei vang hian a chhuah an ring a, mahse, cham a thlang.

Richarlison chuan, "Saudi aṭangin sawmna ka hmu a, mahse, Brazil tana inlan a, Premier League-a khelh zel ka duh avangin he sawmna hi ka pawm thei lo a ni," a ti a, Brazil-ah hmun chan let tuma beih a tum.

Spurs hi Bournemouth striker Dominic Solanke nen sawizawm mek an ni a, English striker hian season hman zawh takah khan match 42 khelin goal 21 a khung a, mahse, Euro 2024 squad-ah a tel phak lo.

Bournemouth-ah kum thum dang khel turin contract a la nei mek a, £65mtd-a lei chhuah theihna dan a awm rualin Spurs hian hei aia tlawm hian lei an tum.