Kan lawm e, Mahi!

Rewind 2004 - BCCI chuan nakin lawka India team puitlinga la khel thei tura an ngaih, India A te chu, anmahni ang bawk Pakistan A leh Kenya National team te nen, Nairobi khawpuia Triangular Series khel turin an tir chhuak a. Chu India A team-ah chuan, a hma pawha India team-a an lo koh zeuh tawh Gautam Gambhir te, Ramesh Powar te leh nakina la in lan tur Ambati Rayudu te leh Ranji Trophy-a khel ṭha rual ho thlan an ni.

India A team-ah hian starting 11-a chang pha chiah pawh ni lo, wicketkeeper Dinesh Karthik-a thachhangdawl turin Ranchi khaw tlangval bahsamsei Mahendra Singh Dhoni chu telh ve a ni.

Nairobi khawpuia inkhel hmasa ber ṭan hma ni hnih lek a la awm tih chuan wicketkeeper rinrawl zawk Dinesh Karthik chu India senior team-ten Netherlands-a Videocon Cup khel turin koh pen a ni a. Karthik awm loh vanneihpuiin Dhoni a chanchin bul inṭanna a lo nih phah ta a ni.

August 16, 2004-a Nairobi khawpui Gymkhana Cricket Stadium-a India A leh Pakistan A intum ṭuma India au phurtu tam zawk chu a hma inkhel vawi thum lo thlir tawh an ni a; batting dan style dangdai tak, ball vaw na deuh mai, a sakhmel leh chezia hmanga cricketer aia rockstar emaw tih mai tur rugby player ni awma taksa inphiar ṭha Mahendra Singh Dhoni-a inkhel en tura lo pungkhawm an ni.

Inkhelh hma hian Pakistan A coaching staff pakhat chuan media hmaah Dhoni chu folk singer tiin a lo chhaih a, khelmualah erawh Dhoni chuan a bat hmangin Pakistan A team chu a lamkawi tir a ni ta ber.

India fans ṭhutnaah chuan nula hmel no tak pakhat, khawvelin Dhoni a hmelhriat hmaa atchilhtu a awm. Nula hian a star em avangin an thlenna hotel-ah a lo chang ṭhin a, Dhoni hian zanriah ei pui a tiam sak hial. Amaherawhchu Dhoni six vuak chuan chu nula ber kher ngalah a per. Mahi tan international level-a century hmasa ber ni mah se nula erawh inhliam vangin a star chaw hlui a kilpui thei ta lo. 

Nula hian Dhoni hneh aṭanga dam leh vat tura card leh  thuphachawina pangpar a dawn chu a lungawipui a ngai ta zawk. India cricket star Dhoni tan cricket zinkawnga a timing fuh lo awmchhun te pawh a ni hial ang.

India wicketkeeper kum hlun Nayan Mongia-a'n kum 2001-ah  a chawlh thu a puang a, kum 2004-a Dhoni inlan hma zawngin national selector-te lu tihaitu ber chu keeping ṭha si, ball vuak lama thawhhlawk bawk si duthusam an hmu lo kha a ni. Kum thum chhung hian player pariat ngawt an en chhin a, Dhoni inlan hnuah chauh lungawina an hmu.

Ranchi tlangvalah hian mak tak maiin technique leh skills-a dah san viau tur a awm lem lo a, chutihrualin damkhawchhuahna tawk tur leh India tana a ṭangkaina ber tur a hre ve tlat thung. Lehkha thiam berte hi a hlawhtling ta ber an ni kher lo ang tho hian, a thleng sang ber ni tur hian, talent nei ṭha ber nih a ngaih kher lohzia tilangtu pakhat chu a ni nghal phawt mai.

Chutah, captain ropui Sourav Ganguly leh a thlaktu senior player Rahul Dravid leh Anil Kumble te hun a inher liam a, kum 2007-a West Indies rama World Cup khelhah India an mualpho. Team insiksawi lai, generation inthlak hun, hun khirh leh buaithlak tak karah, captain dinhmun inhnawhsarum takin Dhoni hnenah an hlan. A tournament hmachhawnpui hmasa ber South Africa rama khelh ICC World Cup T20-ah senior players mumal awm mang loin a naute ho chu an champion pui nghal lawi a. A vannei kan ti dawn nge, a ropui nge, khuanu duan lawk thawnthu, ka hre bik lo le. Mahni mimal ngaihdan 

ṭheuh neih thiang i ti mai ang.

Kum 2004-a India Dressing room a rah hmasak ber ṭum aṭanga ṭhangkhat lian chuang zet chu chhum lo chat loa Hamara Desh tana keeper rinawm tak batsman rintlak leh captain ropui thlenga dinhmun hauh chhoin mihring tung chhova kal tawh phawt chuan he zinkawnga an paltlang mam leh bawl, chhuk leh chho hi a paltlang ve na meuh mai.

Tun ṭumah hian Dhoni a career hi a technical leh tactical a ziah tum pawh ka ni lo. Ziak tura ka mawi loh bakah, ziah sen a ni dawn lo. Google lamah a hming hi chhu la, infiamna khawvela ziaktu lar ber ber tena ngaihnawm tak taka an ziah hmuh tur zaa za tel i hmu nghal ang. YouTube-ah lah sawihona chhiarsenloh hmuh tur a awm.

Chutiang khawpa he infiamna khawvel sawi nghing leh thlak danglamtu, Ranchi tlangval hian kei helai Zoram kilkhawra cricket, mahni tui tuia lo tui ve Mizo tlangval lairil hi a fan ve tlat a, phak ang tawka han mangṭha ka duh ve mai zawk a ni.

India ramah hian engtiklai pawha mipui sing chuang kokhawm thei chu cricket hi a ni a. Pathian tluka an biak te chu heng cricketer te hi an ni. An ei duh zawng, an ui hming, an kekawrte hak rawng thlenga thuruk engmah awm lohna ramah hian a boruak a rip ṭhin em avangin a ruh no deuh tan phei chuan zam chhiat vek theihna tur a ni.

Dhoni erawh cameraman-ten a hmel an rawn focus hi chuan, library-a darkar hnih vel lehkhabu chhiar zo hlim emaw, ṭawngtaina tlanga chawhma chhung inserh hran hnua lo chhuk hlim mai a ang a, hmel emotion nei lo emaw tih mai tura a awm reng thei ringawt mai te hi a mak dangdai ve hrim hrim.

Vanglaini Silly Point lamin Dhoni pual hian a taka a nak zentu India fast bowler Bhuvaneshwar Kumar a kawm a, heti hian Captain Cool-a chanchin a sawi, "Dinhmun derthawng leh chak lo zawk tura kan awm tawh a, player dangte kan men hniam leh beidawn ṭhap tawh chang pawh hian Mahi Bhai-a lam hi han hawi ila, thil engmah thleng lo ang mai a, hmel dam taka ani hotupa ber a lo awm tlat hmuh hi chuan, midang min ti phur thar leh a, chak lo tur zawka ngaih tawh, hnehna chang ta zawk nih chang kan nei fo. Mahi-a hi zawng hruaitu ropui kan ti lo thei lo a, chung zawng ai chuan mihring ropui, mi ṭha, ram rohlu tling pha a ni" a ti hial a ni.

Ni e, Captain Cool, Ice-Man title a neihna chhan hi, fiamthu a inphuah satliah a ni lo - a phu takzet.