Chelsea defender thar Anselmino

Premier League club Chelsea chuan Boca Juniors defender Aaron Anselmino chu pound maktaduai 15.6-in an la lut a, Stamford Bridge-ah season sarih khel turin contract a ziak.

Mahse, Chelsea leh Argentine club inrem danah Anselmino hian season khat chu Boca Juniors-ah hian a khel leh phawt dawn a, 2025-26 season-ah Blues hi a zawm tak tak dawn chauh tihna a ni.

Kum 19 mi defender hian tawnhriat a la nei tam lo hle. June 2023 khan Boca tana a match hmasa ber a khel ve chauh a, inelna hrang hrangah Argentine club langsar tan match 10 a khel ve tawh.

January 2024 khan kum 2028 thleng atan contract thar a ziak a, mahse, Blues an lo lan takah chuan London club lam a hawi leh ta zawk a ni.

Chelsea hian tun nipuiah midfielders Kiernan Dewsbury-Hall, Renato Veiga leh Omari Kellyman, goalkeeper Filip Jorgensen, defender Tosin Adarabioyo leh Caleb Wiley, winger Estevao Willian leh striker Marc Guiu te an la lut tawh a, £115mtd ngawt an seng tawh.

Hetihrual hian Ian Maatsen, Lewis Hall leh Omari Hutchinson te hralhna aṭangin £90mtd an hmu tawh a, Conor Gallagher chuan £33mtd-in Atletico Madrid a zawm tawh bawk. Chelsea hian striker an la zawng mek a, Atletico Madrid forward Samu Omorodion nen sawizawm mek an ni.