Hringnun Zirlaibu Chhehvel

Tun lai ṭhangthar leh a bik takin infiamna khawvela hun hman tumtena an hriat leh nun pui tlat tur quality midang zah (respect), dikna leh zahawmna (dignity leh integrity), tlawmna (humility), chet dan mawi (grace) leh inrintawkna (confidence) zawng zawng hmun khata awm kawhmuh tur  hi awm ngai se, MS-a baka han kawhmuh tur midang hi an tam bik lo viau maithai.

Hmelma leh tumpuite a zah thiam avangin Australia ṭantuten zahna chibai (standing ovation) an pe tawh a. Umpire-in out pe mahse, captain a nihna angin England batsman Ian Bell-a chu out loa a hriat avanga a koh let leh ṭum te, Hyderabad-a ground sira phul lo tan mamtu pakhat a hriat ngai pawh ni bik lo, ground ṭha tak an inkhelhna tur an lo buatsaih avanga lawmthu a hrilh leh a hnua a fanu cancer thu a hriat, tlang hriat miah loha, a enkawlna senso a tumsak vek te kha a entawntlak hle.

India team an chawlh ve lawk laia, a chawrchuahna state Jharkhand team-te first class cricket khel tur train hmanga Kolkata an pan dawn ṭuma, an zinga a chuang ve mai te. Senior-te zah a nat tehreng nen, a captain berin India team a lo lut thar apiang tleirawl zakzum deuh tur te, a lo hmuak hmasa bera, an tlangnel nan a pindanah play station a khelhpui a, foreign vela an zin ṭum chuan bazar turin a chhuah harh pui ṭhin. Ziah tur hi a va tam em. Kan daih dawn si lo.

Dhoni hi chuan midang hmuh loh a hmu fo. Middle order-a chefuh hleithei lo, Rohit Sharma 'Hit Man' a chhuahtu, opener hlauhawm ber a lo nih takna chhan hi amah kan ti lo thei lo. Bit and piece allrounder Ravindra Jadeja world no 1 spinner-a chhuah theihna chhan pawh chuti bawk. Ball an vawm thiam pawh hriat loh Suresh Raina leh Kedhar Jadhav a te kut aṭangin thilmak a haichhuak fo a, khawvel fielding position a awm ngai lo Straight Mid On hmangin Kieron Pollard-a IPL-ah a chhaih buai a. Tleirawltea India team-a lo lut, talent nei si, mahse a talent pho chhuak zo lo, a pindana u chan changa a titi pui zeuh avanga vawiina Virat Kohli Version 2 khawvelin a hmelhriat theihna chhan pawh hi Dhoni a bawk hi kan ti lo thei lo.

A hmingin captain dinhmun a luah tawh loh hnuah pawh hun harsa leh khirh tawn changin, player ho tluk luhna leh inghahna a ni reng a. Pa leh u chan changin , hmatawng nih ngaih hunah a pen hmasa berah ṭangin, a hnunga ngawi renga lo dawmtu nih chang lah a ngah.Virat Kohli-a mawlh hian, a mangan tawpkhawk hi chuan, Dhoni hi a va rawn nasa ṭhin tak em. TV a hmu tute vek kan ni.

India team-a a luh rualpui, a ṭhianpa leh a hnuaia khel, 2007 WC West Indies a an mualpho ṭum leh World Cup T20-a champion team-a a khelhpui, a kawmngeih em em Robin Uthappa chuan Vanglaini Silly Point zawhna te min chhan sak. Uthappa chuan, "Captain leh hruaitu ( leader) awmzia ti lang fiah ber tur chuan, Mahi a nun hi en tawp mai ila a tawk mai awm e. Tin, he cricket khelmual piaha mihring ṭha leh ziktluak, midang tana malsawmna thlentu a nihzia te. Tin, chung zawng zawng ai chuan ṭhian ṭha tia ka damchhunga ka inchhal thei tawh tur hi, Mahi a chanchin tawi fel taka ka sawi theih dan ni mai teh se," tiin min 

chhang a ni.