Man City-in Community Shield an chawi

Premier League khuh hawnna atana hman ṭhin Community Shield-ah Manchester United aiin Manchester City-in a tawp an khar ṭha zawk a, Pep Guardiola hote bawk hi Premier League-ah pawh champion rinkai tur an ni leh ang. Inrinni zan hun pangngaiah 1-1 in an inhnehtawk a, penalty shootout-ah City 7-6 in an vannei zawk.

Wembley Stadium-a inkhelah Man United tan substitute Alejandro Garnacho-a'n minute 82-naah goal khungin chak turah inngai mah se Man City tan Bernardo Silva-a'n minute 89-naah si phurh a sut. Penalty shootout-ah Silva-a'n pet goal lo nghal mah se Man United aiawha pettu Jadon Sacho leh Jonny Evans ten an hlah a, City tan Manuel Akanji-a'n chakna goal a khung.

City nge nge

Man City-in an player ṭha Kevin de Bruyne leh Bernardo Silva te bench-ah an dah a, Phil Foden leh Kyle Walker te squad-ah awm loin inhliam vangin Jack Grealish a tel lo. Rawlthar Rico Lewis, Nico O'Reilly, James McAtee leh Oscar Bobb ten bul an ṭan mah se 'pressing game' an khel ṭha hle.

Man United-in tlarhnung aṭangin in pass chhuah tum mah se patlang ngaihna an hre lo a, goalkeeper ball sem thiam Andre Onana-a'n a pet chhuak leh ṭhin. Brazilian goalkeeper Ederson-a'n inkhelh hmain Etihad Stadium-a a cham tur thu a tichiang a, City tlarhnung buaina chinfelin a awm a tih theih.

United tan lawmna

Man United-in striker Rasmus Hojlund an chhawr thei lo a, an player thar Joshua Zirkzee pawh bench-ah a ṭhu tluan. Heti chung hian Man United-in awmze neiin City an nawr thei a, vanneih ṭum ni se chak ngei tur an ni.

Marcus Rashford-a'n goal khung dan a theihnghilh ta emaw tih mai tur a ni a, Garnacho pass ṭha bik chu goal ban pet per nan a hmang. Captain Bruno Fernandes pawhin mawi zetin goal-ah hlai lut mah se offside vangin pawm a ni lo a, chance ṭha dang a neih ṭumah Rashford pe loin goal-a pet a thlang a, a tisual.

Substitute Garnacho erawh a khel ṭha a, minute 82-naah dinglam aṭanga ṭha zeta khalh lutin goal mawi a khung. Erik Ten Hag-a hote hian City laka chance an neih danah an lawm ang. Chutihrualin Ten Hag a chesual a, Facundo Pellistri chu hun tawp lamah right back-ah dahin goal an chhuah phah.

Minute 89-naah City rawlthar hmuhnawm Oscar Bobb-a cross chu box chhunga pa te ber Bernardo Silva-a'n a tauh lut a, Pellistri-a'n a veng hneh lo. Hun pangngaiah 1-1 a nia, penalty shootout-ah City an vannei ta zawk.