Vawiinah I Day Football Semifinal : Chanmari Vs Police; AFC Vs Ramhlun

GIG Motors I Day Football semifinal chu vawiin hian RG Stadium-ah khelh a ni dawn a, chawhma dar 11:00-a Chanmari FC leh Mizoram Police FC inkhel tur chu inkhel en châkawm bik a ni. Chawhnu dar 2:30-ah Aizawl FC leh Ramhlun Athletic te an inkhel dawn a, knockout a nih tawh miau avangin I League club hi chak chiang saa dah a rem lo.

Dream Semifinal

MPL11 aṭanga thlirin I Day Football dream final chu Chanmari FC leh Aizawl FC a ni a, hei vang hian Chanmari leh Police inkhel tur hi 'dream semifinal' a tih theih ang. MPL ṭantirh aṭangin Police leh Chanmari inkhel hi a nung ṭhin a, kum 12 hnuah pawh a la nung reng.

Chanmari hi chak tura rinkai zawk ni mah se knockout stage-ah tawnhriat nei ṭha Police an danglam ṭhin. Hei chauh hi a ni lo, coach Lalbiaksanga Colney hian coach Lalsangzuala Hmar enkawl Chanmari laka tlawm hi a hreh ang. MPL11-ah Chanmari hian Police hi 1-0 in an hneh tawh a, Lalnunzama'n goal awmchhun a khung. Chutihrualin MPL-a an inkhelh ṭum chu July 12, Zirtawpni daih tawh kha a ni a, transfer inhawn lai a nih avangin team pawh a danglam hle.

Chanmariin Isaac Vanmalsawma leh Vanlalduatsanga te an neih belh a, chutihrualin MPL ṭantirh aiin an game a tlahniam hretah a ngaih theih. Mizoram Police-in FC Lalhmunmawia an neih belh a, tlarhnung phui phah mah se a la phui kim lo. Chanmari pawh MPL11-ah goal la chhuah lo mah se I Day Football-ah goal li an chhuah tawh a, an phui bik lo. Goal a luh ngei a rinawm avangin inkhel a hmuhnawm ang.

AFC leh goal

Aizawl FC-in head coach atana Victor Lalbiakmawia an dah ngheh hnuaah an kal fawr a, I Day Football-ah group of Death-ah awm mah se an khingpui an hneh vek a, goal chhuah loin goal 17 zet an khung. I League club hian vawiin tlai dar 2:30 hian anmahni ang bawka goal khung thei Ramhlun Athletic an hmachhawn dawn.

Ramhlun Athletic hian goal 14 an khung a, an danglamna erawh an tlarhnung a phui lo - goal kua an chhuah. Danny Lalduhawma hote hian I League club lakah tlarhnung rem phui an tum dawn a, chutihrualin an ṭhatna ber attacking football khelh an bansan lo ang.

MPL11-a an intawn ṭumin Aizawl FC hi 3-2 in an chak a, an vannei tel. Chakna goal hi Malsawmzuala Tlangte-in minute 88-naah a khung chauh a, 2-2 a inhnehtawk thei an ni. I Day Football-ah erawh an inhnehtawk a nih chuan extra time khelh a ni dawn a, an la inhnehtawk zel a nih chuan penalty shootout hmanga chak zawk zawn a ni ang. A tawi zawng chuan eng result pawh thleng thei a ni.