Police-in fiahna a paltlang

GIG Motors I Day Football-ah Mizoram Police FC-in semifinal lut turin Chawnpui FC lakah point khat chauh an mamawh a, Lalbiaksanga Colney hote hi 2-1 a chakin point thum an hlawh chhuak.

Inrinnia RG Stadium-a inkhelah Police chungnung hret mah se nuam sain an chak lo. First half tawp hma hretin Chawnpui defender Laltluangliana petchhuah tur chu Lalbiakhlua'n (Hlutea) mawi zetin goal-ah a tilut. Police an vannei a, chutihrualin chance nei tura ball an inpe kual erawh a mawi hle.

Chawnpuiin bench-ah Vanlalthanga leh David Laltlansanga te a dah a, coach B. Malsawmzuala'n second half-ah chak ngei tumin player tawnhriat ṭhate hi a luhtir. Avida'n minute 86-naah si phurh sutin Chawnpui tan beiseina siam mah se nawr an tum luatah Police-in an vaw let a, rawlthar duhawm Michael Lalbiaksanga'n chakna goal a khung.

Injury time-ah Vanlalthanga'n mawi zeta back volley-in crossbar a tihper a, a goal miau loh avangin Police an chak. BS-a hoten point thum an hlawhchhuah avangin FC Bethlehem beiseina a tawp nghal a, mah se beisei tur nei tawh lo FCB-in inelna ṭha taka kharin NorthEast United Reserves 2-1 in an hneh ve bawk.

Chawnpui leh FC Bethlehem ten I Day Football semifinal thleng pha lo mah se an khelh dan avangin MPL11-ah inrintawkna an neih phah dawn a, MPL11 a nung sawt dawn.