Bronze medal latu Sehrawat: A rihna 5kg vel zet a paih hman!

Aman Sehrawat chuan Paris Olympic 2024 aṭangin India tan bronze medal a hlawh chhuak. Mipa 57kg category-ah final lut zo ta chiah lo mah se, pathumna zawnnaah a chungnung zawk a ni.

India tlangval hian Albanian wrestler Zelimkhan Abakarov chu 13-5 in a hneh. Paris khawpuia infiamna khawmpui liana India medal parukna a ni nghal bawk.

Wrestling hi India tan Olympic medal lakna ṭha tak pakhat a ni chhunzawm. Kum 2008 khan Sushil Kumar-a chuan bul ṭanin, a hnu lamah Olympic vawi nga chu India hian medal a la chhunzawm ta a ni.

India tan medal a la a, a medal lak tluk zetin hun rei lote chhunga a rihna pung leh a paih leh dan chuan sawi a hlawh bawk. Semifinal-a Japan mi Yui Susaki a hneh loh hnu khan Sehrawat rihna chu 61.5kg a ni daih.

A rihna hi a khelhna category nena chhut chuan 4.5kg in a sang ta zawk, pathumna zawn hna hun thlen hma rei lote chhungin a paih a ngai tihna a ni a, amah leh coaching staff tan a luhai thlak hle ang tih a chiang.

India wrestling team-ah hian tawnhriat nei ṭha Jagmander Singh leh Virender Dahiya te an awm, anni hian theihtawp an chhuah zui. PTI tarlan dan chuan, darkar khat leh a chanve chhung hah takin an inchaipui phawt.

Chumi hnuah darkar khat chhung tui luma inbualin, boruak lum tak hnuaiah dah zui a ni. Hemi hnu hi chuan a rihna tur aiin 3.6kg chauhin a rit tawh - paih tur erawh a la ngah hle tihna a ni.

Zawi muanga tlan tir leh a ni a, a la tawk mai lo. Treadmill-ah darkar khat chuang tlan tir a ni bawk, inbuk hun a thlen meuh chuan 56.9kg a ni a, a rihna tur bituk aiin 100gram velin a lo hniam ta zawk a, inelna a hmachhawn theih phah.

India coach Virender Singh chuan, "A awlsam loin a hautak takzet, a theihtawp a chhuah bakah keini lam pawhin theihtawp kan chhuah, a tawpah chuan kan tum ram kan thleng," a ti.