Basketball champion USA

United States mipa basketball team zet hi chu ram dang tana cho rual an ni lo. Paris Olympic 2024-ah gold medal an la a, final-ah a thlengtu France chu 98-87 in an hneh.

USA tlangval te hian Olympic neih hnuhnung pangaah gold medal an la fai vek a, kum 20 chhung chu ngam loh an tawng lo tihna a ni. NBA neitu an ni bawk a, infiamna khawmpui lian pawh an thunun takzet.

Inrinni zan Bercy Arena-a inkhelah a thlengtu France lamin ṭantu an nei ṭha a, thawm pawh a na hle. LeBron James leh Stephen Curry te an tel miau avangin khawvelin a thlir ṭhup mai a ni.

Mipui 20,000 chuang hmaah France hian chakna remchang pawh an nei a, quarter hnuhnung berah 82-79 a ni hman; France hian 3-points neih belh zauh se la chuan an umphak thei dawn a, champion tur pawh chiang lo thei ang.

Mahse, hun pawimawh laiah tak Curry a inlar - American star hian 3-points a rawn nei ta zawk daih a, 85-79 a hma hruai falin hnung lam an hawi tawh lo a, che buai thei dinhmuna an din laiin NBA-a a tih ṭhin dan angin harsatna a rawn chingfel.

LeBron James chuan Curry chungchang sawiin, "Theihna a neih sanzia hi sawi nawn a ngai lo a, basketball khel tura mi danglam bik chu a ni. A khingpui lamah ka ṭang fo tawh a, amah hi ka hrechiang.

"Tunah chuan team pakhat tan kan bei dun a, a hahdam thlak hle. Ani hi chuan ball awmna a hre zel a, hun harsa laiah mawhphurhna lain a hlen chhuak ṭhin," tiin Curry a fak thiam hle.

Tun ṭuma US tana Paris Olympic hmachhawn tute hi Michael Jordan leh Magic Johnson te awmna US team nen khan khaikhin ṭhin pawh an ni a, player ṭha leh langsar rual an nih avangin an khaikhin hi a mak hran lo.

NBA Most Valuable Player ni tawh pali - James, Curry, Kevin Durant leh Joel Embiid te an awm a, NBA All-Star zinga tel tawh mi 11 niin, basketball inelna lian NBA champion zat pawh pasarih an ni.

Inkhel a zo a, an champion tih a chian chiah chuan Curry chu mipui mit fukna a ni. A khelhpui te chu a bulah tlan khawmin an kuah a, player langsar bik James chuan an ram puanzar a rawn lek chhuak bawk.

US coach Steve Kerr chuan, "Stephen chuan a tawpah danglamna a siam leh ta, kha chu thil thar a ni tawh lo. Kan hlawhtlin chhan erawh player 12 ten theihtawp chhauha an beih vang a ni thung.

"Chawlhkar ruk chhung kan awmkhawm a, inbuatsaihna a ṭhain tun hun hi kan thleng. Match zawng zawngah duhthusam ni vek thei lo mah ila a pawimawh ber gold medal kan la," tiin a sawi a, a naute medal lakah a lungawi hle.