Sawi hlawh Imane Khelif a champion

Hmeichhia a nih leh nih loh chungchangah inhnialna a tam a, a bik taka endik a nih hnuah pawh Imane Khelif chu Paris Olympic 2024 hmachhawn tluan tir a ni, a tawpah gold medal a hnek chhuak.

Algerian boxer Khelif hi hmeichhe welterweight huangah a inlan a, gold medal inchuhnaah a khingpui Chinese mi, world champion ni bawk Yang Liu chu round nga an inhnek hnuah unanimous decision in a hneh.

Kum 25 mi Khelif chuan, "Hmeichhe dangte ang bawkin hmeichhe dik tak a ni a, chuvangin he infiamna huanga inlan tur hian ka tling tawk a ni. Hmeichhia ni turin ka lo piang a, hmeichhe khawsak a khawsa in hmeichhe inelnaah ka tel, rinhlelh tur a awm lo e," a ti.

Tun hmain World Championship aṭangin paih chauh (disqualified) a lo ni tawh. International Olympic Committee (IOC) erawhin Olympic hmachhawn tura tling tawkah a ngai thung.

International Boxing Association (IBA) chungchang sawi lang telin Khelif chuan, "Min hua tih ka hria, a chhan erawh ka hre lo," tiin khawvelin amah an ngaihven lai takin hmeichhia a nih leh nih loh chungchanga buaina nei IBA a bei let.

World Championship aṭanga an lo paih ve tawh pakhat zawk Lin Yu-ting pawhin Olympic hi a hmachhawn thei a, Taiwan nula hian Poland boxer Julia Szeremeta chu unanimous decision a hnehin featherweight title a la ve bawk a ni.