Inter School TT inelna a hlawhtling

Mizoram Table Tennis Association (MTTA) leh Mizo Zirlai Pawl (MZP) te buatsaih MZP Inter School Table Tennis Tournament chu August 7-9, 2024 chhung khan hlawhtling taka neih a ni.

Inelna hi Hawla Indoor Stadium, Republic Vengthlangah neih niin, elementary, high school leh higher secondary huanga ṭhen a ni a, zirlai 90 chuangin tournament hi an hmachhawn. District hrang hrang – Aizawl, Lunglei, Kolasib, Serchhip leh Hnahthial school te aṭangin he tournament hi an khel tel a ni.

Inter School Table Tennis Tournament-ah hian South Tuipui bialtu MLA Jeje Lalpekhlua khuallian niin, zirlai kalkhawm te hnenah, talent nei tawh hnua thawhrim pawimawh zia te, naupang an vanneihzia leh facilities ṭha an neih te chhawr ṭangkai turin a fuih a, beidawng loa sang tak thleng tura ṭan la zel turin a fuih bakah. Zuk leh hmuama insum tur leh eng dinhmun pawh thleng sela, an ṭo chhuahna coach te theihngilh lo turin a chah a ni.