Spurs-in Solanke an la lut ta

Season tharah Tottenham Hotspur-in tih mai mai an tum lo - Bournemouth striker Dominic Solanke an la lut a, a man hi pound maktaduai 65 thlenga sang chho thei tur a ni.

Spurs chuan English striker manah hian £55mtd an pe phawt ang a, a khelh ṭhat dan a zirin £10mtd dang an pe leh ang - a man hi an pek tlak vek chuan London club player man to ber a ni ang.

Kum 26 mi Solanke hian Spurs-ah kum 2030 thleng khel turin contract a ziak a, nipui transfer-a Spurs player lakluh palina a ni. Tottenham hian Yang Min-hyuk, Lucas Bergvall leh Archie Gray te chu an lo la lut tawh.

Solanke chuan, "Spurs hi club ropui tak a ni a, hmachhawp ropui tak a neih avangin kan rilru a inhmu hle. Spurs tana inlan a, ka ṭhian tharte tawn hlan ka nghakhlel tawh takzet a ni," a ti - August 19, zan dar 12:30-ah Spurs hian Leicester City chu season thara an league match hmasa ber khel turin an lenchilh ang.

Striker thar

Spurs hian season hmasa ṭan dawna Harry Kane an chân hnu khan, a hmun ruak luah tur player lakluh an nei lo - tunah Solanke an la lut ta a, coach Ange Postecoglou-a'n striker thar mamawh nia a insawina chu phuhruk a ni dawn ta.

Chelsea academy aṭanga inzir chhuak Solanke hi English player beiseiawm ber pawl a ni ṭhin a, 2014-15 season khan Chelsea Academy Player of the Year a ni a, England Men's Youth Player of the Year atan kum 2014 khan thlan a ni bawk.

FIFA Under-20 World Cup 2017-ah England champion puiin, best player atan thlan a ni a, mahse, Chelsea-ah hmun a chang phak lo. Dutch club Vitesse-ah loan-in season khat a khel a, match 26-ah goal sarih a khung.

Blues tan match khat chiah a inlan hnuah, Liverpool sawmna pawmin Anfield lam a hawi a, mahse, Solanke-a che fuh hleithei lo - Merseyside club tan match 27-ah goal khat chiah a khung a, January 2019 khan £19mtd-in Bournemouth a zawm.

Hei le Solanke

Solanke hian Cherries a pan hnuah pawh beisei angin hun a hmang lawk lo. Bournemouth-a a hun hmasa lam, kum khat leh a chanve chu Premier League khelin, inelna hrang hrangah match 46 inlanin, goal li chiah a khung!

Mahse, 2020-21 season-ah Championship khelin, Solanke tak tak kan hmun ṭan. English second division lama season hnih hun a hman chhungin match 93-ah goal 45 a khung a, Premier League an kai hnuah pawh a chet ṭhat chhunzawm.

2022-23 season khan match 35-ah goal sarih a khung a, season hman zawh takah match 42 khelin goal 21 a khung a, English top flight league-a striker 'hot' ber pawl a ni der tawh.

Gareth Southgate-a'n heti chung hian Euro-a hruai tlakah ngai lo mah se, Postecoglou-a'n ngaihdan dang a nei a, London club-ah a seng lut ta - eng tak ang zel ang maw?

Chona thar

Solanke chuan, "He club-in tum ropui tak a neihna hian min tiphur hle. Manager ṭha tak leh player ṭha tak tak an nei a, an khelh dan hi ka khelh dan nen a inrem hle ka ring bawk. Khelmuala inlan vat a, ka theihna pholan ka châk tawh a ni," a ti.

England tana vawi khat inlan tawh Solanke-a'n Spurs a zawm avang hian a club hlui Liverpool chuan hlawkna an lo tel ve dawn - kum 2019-a Solanke-a'n Cherries a zawm khan, an hralh leh dawn a nih chuan Reds-in a hralhna sum aṭanga 20% an chan ve tur thu an ziak tel.

Bournemouth chief executive Neill Blake chuan, "Kum nga liam taa Dominic kan lei khan, vawiin hun ang hi kan la thleng ang tih hi chu kan rin dan sa a ni. Spurs nena indawrna hi a kal chak angreng a, hetih chhung zawng hian Dominic hi a professional em em a, lawmthu ka sawi duh.

"He club-a cham chhunga khelmual chhung leh pawna a nihphung dik tak chu duhawm takin a pholang a ni. Kan club player man to ber ni tura Dominic kan hralh thei hi ka lawm a, Bournemouth chuan duhsakna sang ber kan hlan a ni," a ti a, an striker chhuanvawr a thlah.