Barcelona kawr ha tur Olmo

Euro 2024-a Spain champion puitu Dani Olmo chu Barcelona player a ni ta - kum 26 mi playmaker hi euro maktaduai 60-in Catalan club hian an lei a, Catalan club tan hian kum ruk chhung khel turin contract a ziak.

Barcelona hian an player thar hi club dang tana lei chhuah theihna dan an ziak tel a, a lei chhuak duh tan erawh €500mtd insen huam a ngai dawn thung - a lei chhuah theih loh tihna a ni ber.

Catalan club chuan thuchhuah siamin, "A khelhna apiangah, a thiam bik em avang leh a khelhpuite tana khelhpui nuam tak a nih avangin Olmo hian a hming a chher zel.

"Euro 2024-a kan hmuh ang khan goal khung thei tak a ni a, penalty box chhung leh pawn aṭang pawha goal khung thei bik a ni," an ti a, an player thar chu an chhuang hle.

Kum 26 mi Olmo hi Barcelona academy hmingthang La Masia chhuak a ni a, mahse, rin loh takin Croatian club Dinamo Zagreb a zawm teh daih! February 2015 khan Croatian club tan a match hmasa ber khelin, regular taka a khelh ṭan chu 2017-18 season kha a ni.

January 2020 khan RB Leipzig a zawm a, Bundesliga club tan hian inelna hrang hrangah match 148 khelin, goal 29 a khung a, assist vawi 34 a nei. Season hman zawh takah khan match 25 khela goal riat khungin, assist vawi nga a nei a, Euro 2024 khelh zawh takah khan top scorer zingah telin, team of the tournament-ah a lang phak bawk.

Olmo chuan, "Player naupang tak leh club naupang tak kha kan intawng dun a, hmalam kan pan ho a nih kha. Kan nomawi hmasa ber chawiin, thawnthu ngaihnawm kan ziak ho a, RB Leipzig ka lawm e - ka thinlungah in cham reng ang," tiin a club hlui a thlah - Leipzig hi German Cup-ah vawi hnih a champion pui hman.