Udinese-ah Sanchez a lut

Arsenal leh Manchester United forward hlui Alexis Sanchez chuan a club hlui Udinese chu kum 18 hnuah free transfer-in a zawm a, European football-a a club hmasa berah a khel leh dawn tihna a ni.

Kum 35 mi forward hian July thla khan Inter Milan-a a contract neih lai chu a hmang zo a, Serie A champion hian contract thar an ziahpui loh avangin a duh lam pan turin zalenna a nei - Udinese a thlang.

Sanchez hian kum 2006-2011 inkar kha Udinese-ah hian a lo khel tawh a, kum hnih atan contract a ziak. Udinese aṭang hian Barcelona a zawm a, Catalan club-ah beisei anga hmun a chan loh hnuin kum 2014 khan Arsenal a pan.

Gunners tan match 166-ah goal 80 ngawt khungin a hming a chher a, mahse, kum 2018 khan amah ṭantute hnungchhawnin Manchester United a zawm. Old Trafford-ah beisei angin a hlawhtling zui lo a, match 45-ah goal nga chiah a khung!

Kum 2019 khan Inter chu loan-in a zawm zui a, kum 2020-ah a nghetin Italian club hian an la. Kum 2022-ah a contract tihtawp niin, Ligue 1 club Marseille-ah season khat hun a hmang leh a, season hmasa khan Inter bawk a zawm.

Season khat hnuah Inter a chhuahsan leh ta a, European football-a pholangtu Udinese tan kum upat tawh lamah hming chher leh a beisei ang.