Chelsea-in Pedro Neto an la dawn

Football transfer hi Chelsea-in nuam an ti ber mai - Wolverhampton Wanderers aṭanga forward Pedro Neto la lut turin Premier League club hi inremna an neihpui leh ta a, an Inrinni zing bazar vel mai mai a ni ber!

Blues hian Neto lakluh nan pound maktaduai 54 an seng dawn a, he thu buatsaih a nih lai hian medical nei turin a inpuahchah mek - he thuziak i chhiar meuh chuan an in la lut fel tawh hial mai thei.

Chelsea leh Wolves inrem dan chuan London club hian £51.3mtd an pe phawt ang a, a khelh ṭhat dan a zirin £2.6mtd dang chu pek belh leh tur a ni. London club hian Wolves hi a hmain vawi hnih an lo dawr hlawhchham tawh a, an dawrna pakhatah phei chuan player pahnih David Datro Fofana leh Trevoh Chalobah zinga a tu emaw zawk pek tel a tel.

Mahse, Wolves hian dawrna hmasa pahnih an hnar hnuah, a vawi thumna an pawm ta. Kum 24 mi Neto hian kum 2019 khan Lazio aṭangin Wolves hi a zawm a, match 135-ah goal 14 khungin, assist vawi 24 a nei - Chelsea hi a zawm a nih chuan Wolves player hralh man to ber a ni ang.

Chelsea hian tun nipuiah player pakua ngawt la lut tawhin, £140mtd an seng tawh a, midfielder Kiernan Dewsbury-Hall, Renato Veiga leh Omari Kellyman, goalkeeper Filip Jorgensen, defender Tosin Adarabioyo, Aaron Anselmino leh Caleb Wiley, winger Estevao Willian leh striker Marc Guiu te an la lut tawh.

Blues hian goalkeeper Mike Penders chu Belgian club Genk aṭanga la lut turin inremna an neihpui tawh bawk a, £17mtd man tur keeper hi Chelsea senior keeper pariatna tur a ni! Mahse, Genk lamah hian season khat chu loan-in a khel leh phawt ang.

London club hi Atletico Madrid forward Samu Omorodion chu £34.5mtd-a la lut thei dinhmunah an ding mek bawk a, Penders, Omorodion leh Neto te hi an la lut a nih chuan nipuiah player 12 an la lut dawn tihna a ni a, £240mtd an senna chiah a ni bawk ang.

Hetihrual hian Blues hian Ian Maatsen, Lewis Hall leh Omari Hutchinson hralhna aṭangin £90mtd an hmu tawh a, Conor Gallagher chu Atletico Madrid lamah £33mtd-in an kaltir dawn bawk.