Mipa football-ah Spain-in gold la

Euro 2024-ah Spain an champion a, Olympic an khel a, Spain Under 23 team an champion ve leh ta - Zirtawpni zan khan 5-3 in inelna thlengtu France chu final-ah an hneh a, gold medal an hlawh chhuak.

Parc des Princes-ah mipui 44,260 zetin mipa football final hi an en a, mahse, France mipuiten an beisei ang result an hawn lo. Thierry Henry enkawl France tan Enzo Millot chuan minute 11-na lekah goal hmahruai a khung a, Spain hian first half chhungin Fermín López goal hnih leh Álex Baena goal hmangin an chhanglet a, chawlhlawk an hman meuh chuan 3-1 a ni.

Mahse, second half chu France chan ni ve leh thungin, Maghnes Akliouche chuan minute 79-naah si phurh a sut ṭhen a, Jean-Philippe Mateta chuan hun pek belh minute thumnaah penalty hmangin si phurh a sut zo - boruak a 'hot' rem rem hle.

Goal dang lut tura hun a awm tawh loh avangin extra time khelh zui a ni a, a tawpah erawh Spain bawk a chungnung zawk an ni - Rayo Vallecano forward Sergio Camello chuan goal hnih khungin La Roja a chhanhim a, inelna thlengtu lakah 5-3 a chakin gold an hlawh chhuak.