Fiorentina-ah De Gea a lut

Italian club Fiorentina chuan Manchester United keeper David de Gea an la lut a, vawiinah hian fans hmaah tlangzarh a ni ang - kum 33 mi keeper contract rei zawng hi Serie A club lam hian an tarlang lo.

De Gea hian kum 2023 khan United-a a contract a hmang zo a, Old Trafford a chhuahsan hnuah club dang a zawm lawk thei lo. Tun season-ah erawh club a nei dawn ta a, Serie A lamah a inlan ang.

Spanish keeper De Gea hi United chhuanvawr ni ṭhinin, English club tan match 545 a khel hman a, kum 13 a cham chhungin Premier League-ah vawi khat a champion pui a, FA Cup, League Cup (2), FA Community Shield (3) leh Europa League-ah te champion nomawi a chawipui.

De Gea hian United-ah khan kar khatah £375,000 a hlawh nia sawi a ni a, Fiorentina-ah erawh kum khatah chhiah chawi vek hnuin euro maktaduai hnih vel a hlawh dawn niin an sawi - United-a a thla hnih hlawh vel kha kum khatah a hlawh dawn tihna a ni.

Season hman zawh taka Serie A pariatna Fiorentina hian kum 2001 khan Coppa Italia nomawi chawiin, he mi hnu hian champion nomawi an chawi leh tawh lo - season zawn chu UEFA Conference League final an lut tawh a, an chak zo lo ve ve.