Messi chungchangah Barca an ṭawng chhuak Player thar Francisco Trincao an tlangzarh zui

Infiamna khawvel nghawrnghing dawt khawpin Lionel Messi-a'n Barcelona hnenah chhuah dilna a thehlut a, football khawvel bik phei chuan khaw dang a hawi thei meuh lo a ni ber. 

Infiamna lam ziakmite pawhin 'inrinsiak' bak tih theih an nei bik rih lo a, tun dinhmunah chuan, "Khawiah nge Messi a kal dawn?" tih zawhna leh, "A châm leh zawk mai lo maw?" tih zawhna hi a chhang thei tumah an awm lo!

Barca an ngawih reng hnuah sporting director thar Ramon Planes chuan Lionel Messi chu Nou Camp-a cham tura hmin an tum thu a sawi a, "Khawvela player pawimawh ber behchhana team din hi kan la tum fan a ni," a ti. 

Catalan club hian January-a inremna an lo neihpui tawh Portuguese forward Francisco Trincão chu social media kaltlangin an tlangzarh zui a, mahse hei pawh Messi boruak bawkin a hliahkhuh. 

Barca fan-ten Messi chhuak tur thawm an hriat rualin an lungawi lohna an lantir nghal a, fans tam takin club president Josep Maria Bartomeu chu Nou Camp chhuahsan turin an nawr. Mahse, sporting director Ramon Planes chuan, "Thil thleng tur chu a thleng tawh a, keini chuan khawvela player pawimawh ber behchhana team din hi kan la tum fan a ni. 

"Khawvela footballer ṭha ber, footballer awm tawh zawng zawnga thiam ber hoa hnehna chan chhoh leh hi kan duh. Barca leh Leo hi chu 'inneihna' ang mai a ni. Kan pahnihin thil ṭha tinreng kan intihsak tawn a, kan hma hunah lungngaihna tur awmin ka hre lo," a ti a, Messi chhuah a ring lo. 

Ballon d'Or vawi ruk dawng thei Messi hian Barca tan goal 634 ngawt a khung tawh a, Argentine striker hi a chhuak a nih chuan a thlaktu tur zawn chu khawvela hna hautak ber a tling hial ang. 

Hei le Trincao 

Barcelona hian January khan Portuguese club Braga striker Trincao chu pound maktaduai 26-a lalut turin inremna an neihpui tawh a, Nilaini zan khan official-in Trincao an lakluh thu hi an puang. 

Kum 20 mi forward hian season hman zawh takah khan Braga tan inelna hrang hrangah match 40 khelin goal kua a khung a, Barca-ah hian kum nga chhung atan contract a ziak - a lei chhuak duh tan euro maktaduai 500 insen huam a ngai ang. 

Mahse, player thar puanzarna pawhin Barca fans a ti lungawi zo lo - social media lama club-in an striker thar leh Bartomeu-te contract ziak lai an tarlan chu #BartomeuOut tih hmangin an chhanglet a, Messi lawm lohna chu an tan pawh lawm lohna a ni. Barca sporting director Planes chuan, "Kan hma hun atan player naupang kan mamawh ang bawkin tawnhriat nei ṭha Leo Messi-te ang hi kan mamawh a, Barca leh Messi-te hi kan thawh ho zel theihtawp kan chhuah zel ang," a ti. 

Messi hi Manchester City nen sawizawm zel an ni a, thuthang leng vel a tam hle - media ṭhenkhat chuan England-ah City nena indawrna kalpui turin Messi pa chu a kal tawh niin an sawi!

Messi hi Manchester City leh an coach Pep Guardiola-te chuan an dawr tawh niin ESPN chuan an tarlang a, contract an zawrh ang chuan Premier League-ah kum thum a khel phawt ang a, chumi hnuah chuan MLS club New York City chu kum thum khel turin a zawm leh ang. 

Mahse, Planes chuan, "Zah takin engkim kan kalpui tur a ni. Leo leh Barca indawrna hi mipui vantlang hriatah kan puanzar a rem lo a, chutianga puanzar chu an pahnih hian an phu lo bawk. 

"Keini chuan inremna a awm ngei theih nan club chhungkuaah theihtawp kan chhuah ang - hei hi kan tih ṭhin dan a ni a, hnehna chang ṭhin Barca bawk kha kan din leh theih nan kan ti zel bawk ang," tiin a sawi.