A mawina nen Paris Olympic 2024 a herliam ta; USA bawk an chungnung leh ber!
Paris Olympic Games 2024 chu Pathianni zan khan khar a ni - International Olympic Committee (IOC) president Thomas Bach chuan a khar a, kum li hnuah Los Angeles Olympic neih leh a ni ang - Olympic puanzar chu inhlan chhawn nghal a ni.
Infiamna khawmpui lian berah hian United States of America (USA) chu an chungnung ber a, gold medal 40, silver medal 44 leh bronze medal 42, a vaiin medal 126 an la a, Olympic hnuhnung pariatah vawi sarih ngawt an champion.
US dawtah hian China an awm, ram ropui pahnih hian gold medal 40 ve ve an la, mahse China hian silver leh bronze medal lak tam lamah US hi a tluk lo - gold medal 20 latu Japan chuan pathumna dinhmun an luah bawk.
India chuan gold medal a la phak lo a, silver medal pakhat leh bronze medal panga, a vaiin medal paruk lain a pumpuiah 71-naah an awm. Paris Olympic-ah hian ram 206 bakah IOC Refugee Olympic Team ten inelna an hmachhawn a ni.
A tawpah USA
Khawvel ram ropui pahnih United States leh China ten ropui zawk nih an inchuh a, infiamna khawvel awptu nih an tum ruh hle. Paris Olympic champion nih an tumna kawngah pawh an inum tawk takzet a ni.
Pathianni zan khan a hmawr bawk a ni a, inelna tawp ni thleng hian a chungnung tur zawk a la chiang lo. A tawp ni hian China chuan gold medal 39 lain table hmahruaitu zawk an ni, an hnungah USA (38 gold medal) an awm thung.
A khar niah US hian hmeichhe basketball bakah track cycling, wrestling leh volleyball an la hmabak. China erawhin weightlifting bak hmachhawn tur an nei tawh lo thung, an dinhmun inthlak thei a la ni tih an hrechiang hle.
China hian gold medal pakhat an lak belh a, an inthlauhna chu gold medal pahnih a ni ta - US tan Jennifer Valente (track cycling) chuan lak belh ve lehin, a tawp kharna tur chu hmeichhe basketball chauh a ni tawh - US beiseina awmchhun a ni ta.
Khawvelin US nula te leh France nula ten basketball final an khel chu an ngaihven a, gold medal inchuhna a nih bakah Olympic gold medal chungchanga US leh China inelna a ni tel bawk, a boruak a nung takzet.
Mipa team champion puitu LeBron James leh French President Emmanuel Macron te pawhin a hmunah an en. Minute nga chauh khelh hmabak la awmah US hi 53-51 in an hniam zawk, a tawpah tho chhuakin 67-66 in an chak - an chakna hi point khat chauh a ni.
US hian hmeichhe basketball team an champion chiah hian China chu gold medal lak tam lamah an tluk chiah a, a hma lama silver medal leh bronze medal an lak tam tawh zawkna nen an chungnung ta zawk, a tawpah an sang zawk ta hram.
Mi bik Marchand
Paris Olympic ṭan a nih hma khan khawvelin hmuh chak hrang hrang a nei a, che ṭha tura rinkai pawh an tam, chung zingah chuan Leon Marchand pawh a tel a, inelna neih zawh a nih meuh chuan a chungnung ta hle.
France tlangval tui hleuh thiam, theihna sang tak neitu Marchand hian mimal inelna a hmachhawn pali - 400m individual medley, 200m breaststroke, 200m butterfly leh 200m individual medley-ah te gold medal a la vek.
Mimal inelna chauh a ni lo, huho inelna 4x100m medley relay huangah an ram chu bronze medal a lakpui bawk - Michael Phelps hnuah Olympic pakhata mimal gold medal pali la leh thei hmasa ber a ni hial.
French swimmer hi Paris 2024-ah chuan mimal medal la hnem ber a ni nghal a, a sulhnu hian hriatreng a hlawh tawh ang. Mi pakhatin gold medal pali a la a ni a, gold medal pakhat pawh la lo India tehna aṭang phei chuan sang tak a ni.
Kum 22 mi Leon Marchand hi tui hleuh thiam Xavier Marchand-a fapa a ni a, sial rangin sial rang a hring kan ti thei ang. Chutihrualin a naupan lai aṭanga tui hleuh nghal ngawt erawh a ni bik lo thung.
A tirah chuan Judo a khel a, chumi hnuah Rugby pawh a khel hmasa leh phawt. Infiamna chi hnih a tih hnu hian a nu leh pa thuawihin swimming lamah a kal, a kawng tura ruatah hian khawvel hriat khawpin a ding tlang ta a ni.
Marchand chuan, "Tui ka hleuh ṭan khan kum sarih mi ka ni a, vawt ka tiin a tirah chuan nuam pawh ka ti chiah lo. A nihna takah chuan chawlh hman laia tui chen mai mai kha nuam ka ti tawk chauh, a hnuah erawh a danglam," a ti.
Inelna thlengtu France tan Marchand hian a thawhhlawk em em a, ram mipui thlawpna an dawng ṭha bawk. France hian gold medal 16 an la a, hei bakah hian silver medal 26 leh bronze medal 22 nen pangana dinhmun an luah.
Thomas Bach, IOC President thusawi
"Ṭhian duh tak - infiammi ropui leh infiamnain a koh khawm duhtak te u, khawvel hmanhmawh leh chiri tawh tak karah Paris khawpuiah hian inelna ṭha hmachhawn turin in lo kal a. National Olympic Committee hnuaia ram 206 bakah IOC Refugee Olympic Team te chuan Paris khawpui mawina belhchhah tur leh khawvel hmuha pho lang zual turin inrawn fuan khawm a ni.
"Infiammiten inelna thianghlim leh hmuhnawm in lantir a, inelna hmachhawn tu zawng zawng in hmuhnawmin mahni thiamna zawna mi bikte vek in ni, infiamna mai bakah mihringa mihrinna lo lang khan kan lawmna a tizual.
"Paris Olympic kan neih chhung hian lungrual leh thlamuang takin kan cheng ho a - Olympic Village chhungah inngaihsak tawn takin kan awm khawm. Kan awmna ramte chu indona leh inhnmuh thiam lohna neite an ni hlawm a, ramri vanga awm hrangte kan ni, chung mite chu Olympic chhungah chuan lungrual takin kan awm khawm.
"Hetianga inunauna ṭha kan neih leh lantir hian khawvel hmun danga mihring dangte rilru pawh a hneh ngei ka ring. Khawvel nuam leh ṭha zawk hi kan beisei a, kan duhthusam pawh a ni - infiamna hian chu hmun chu min thlen theih ngei pawh ka ring.
"Olympic Games hian remna leh muanna a siam thei lo tih chu kan hria. Mahse, he infiamna khawmpui lian hian rem leh muanna duhtu mihring a siam belh thei tih erawh ka hria a, keimahni awmna hmun ṭheuhah remna leh muanna siamtu kan nih theih ka duh a, hei hi kan put darh zel pawh ka ring bawk a ni.
"France ram hian Olympic hriatreng tur leh ropui tak min chhawpchhuahsak a, mellung pawimawh tak tak phun a ni bawk. Olympic a hlawhtlin theih nana hma latu zawng zawngte chungah lawmthu ka sawi bawk.
"Tunah chuan, kham lo leh ui tak chungin XXXIII Olympiad Paris 2024 chu ka khar ta. Dam leh hrisel takin awm ila, tun aṭanga kum li hnuah infiammi duhawm leh chawrno tak takte nen Los Angeles, United States of America lamah XXXIV Olympiad kan hmang leh dawn nia.
"Paris khawpui chungah kan lawm - France ram chungah kan lawm. Olympic Games leh France vul zel rawh se,"