Aizawl FC-in belhchian an dawl

13th August, 2024

I League club Aizawl FC-in GIG Motors I Day Football final lut turin nimin khan Ramhlun Athletic 4-1 in an hneh a, final-ah Chanmari FC hnehtu Mizoram Police FC an hmachhawn ang. Coach Victor Lalbiakmawia kaihhruai AFC-in I Day Football match nga aṭangin goal 21 an khung a, goal khat chauh an chhuah.

Nimin inkhelah first half-ah goal a lut lo a, Samuel Lalmuanpuia'n goal ṭha bik a khung hnuah Aizawl FC dinhmun a ṭha. I League club tan C. Lalhriatpuia, Lalbiakdika leh Zomuansanga ten an khung belh a, Ramhlun tan Richard Lalrammuanpuia'n goal khat a khung ve bawk.

A hmuhnawm e

Ramhlun Athletic-in anmahni aia ṭha zawk Aizawl FC an hmachhawn tih an hria a, fimkhur takin an khel. Ṭum dang ang lo takin Danny Lalduhawma hoten goal venhim hna an thawk a, tlarhnung lamah player an ṭhahnem.

First half-ah Ramhlunin an tum an tihlawhtling a, Aizawl FC an dangchat. Chutihrualin captain Lalchhawnkima'n hnai tak aṭangin goal ban a tauh ber a, a goal emaw tiin a goal khung a lawm hman teuh hle.

Second half-ah pawh Ramhlunin bul ṭan chhe lo mah se player ṭha bik danglamna a lang a, I League nomawi vawi hnih chawi tawh Samuel-a'n minute 55-naah box pawn aṭangin mawi zetin a volley lut. Zemabawk North attacking midfielder hi ṭum dang angin langsar lo mah se a hunah tak a rah.

A goal belh

Ramhlunin goal venhim ringawt an tithei ta bik lo a, an nawr ve a ṭul tawh. AFC tlarhmain chance an ngah phah a, Augustine Lalrochana ball pet chu Ramhlun player-in dang mah se a per chu C. Hriata tan a rem chiah - Farkawn tlangvalin tun inelnaa a goal thumna a khung.

Tun season-a player langsar bera chhal ngam BD-a pawh a vanduai reng lo a, minute 79-naah dinglam aṭanga la lutin box pawn aṭangin goal kilah ṭha zetin a khung. Ramhlunin injury time-ah Richard Lalramnunpuia hmangin si phurh sut ṭhen mah se AFC substitute Zomuana'n a khung belh lehnghal a, 4-1 in inkhel a tawp.

Season liam ta khan Victor-a kaihhruai Aizawl FC-in final lut mah se Chhinga Veng lakah an vanduai. Tun season-ah kum 2016 hnua a vawi khat nan I Day Football nomawi chawi ngei an tum a, final-ah tun season-a vawi hnih an hneh tawh Mizoram Police an hmachhawn ang.