Chelsea-in Neto an la lut, Felix an rim zui

Nipui transfer-a sum hmang na tak Chelsea-in chawlh zai an rel lo - Wolverhampton Wanderers forward Pedro Neto chu Stamford Bridge-ah an seng lut leh ta a, pound maktaduai 54 an inseng.

Kum 24 mi forward hian Chelsea tan kum sarih chhung khel turin contract a ziak a, a contract hi a hmang zo a nih chuan kum 2031 thleng London club tan a khel dawn tihna a ni.

Neto chuan, "Chelsea ka zawm thei hi ka lawm takzet a, vawiin ang hun thleng tur hian ka thawkrim em em a ni - Chelsea jersey nena khelmuala luh hlan ka nghakhlel tawh takzet," a ti.

Chelsea hian £51.3mtd chu Neto manah hian an pe phawt ang a, a khelh ṭhat dan a zirin £2.6mtd chu la pek belh leh tur a ni. Blues hian an club-a loan-a lo khel tawh Joao Felix lam an hawi lehnghal bawk!

A tawpah chuan

Blues hian Wolves hi a hmain vawi hnih an lo dawr tawh a, mahse, an hlawhchham ve ve. An dawrna hmasaah chuan player pahnih David Datro Fofana leh Trevoh Chalobah zinga a tu emaw zawk pe tel turin an ti a, mahse, Wolves hian an hnar ve ve.

A tawpah chuan Wolves lungawina tur zanin Chelsea-in an dawr a, an inrem thei ta. Neto hi kum 24 mi chauh a la nih avangin a vanglai hun a hmang dawn chauh a, Blues-in heti zata an ngam pawh hi a awm hle.

Kum 2019 khan Lazio aṭangin Wolves hi a zawm a, match 135-ah goal 14 khungin, assist vawi 24 a nei - Chelsea-in an lei chiah hian Wolves player hralh man to ber a ni nghal a, Ruben Neves-a record lo siam tawh chu a khum.

Wolves captain ṭhin Neves hian kum 2023 khan Saudi Arabia club Al Hilal chu £47mtd-in a zawm a, an player hralh to ber record a lo siam tawh a, Neto hian a khum ta - player pahnih hi Portuguese ve ve an ni.

Sum ngah Chelsea

Neto an lakluh chiah hian Blues-in tun nipui transfer-a an sum sen zat chu £185mtd-ah a kai chho a, midfielder Kiernan Dewsbury-Hall, Renato Veiga leh Omari Kellyman, goalkeeper Filip Jorgensen, defender Tosin Adarabioyo, Aaron Anselmino leh Caleb Wiley, winger Estevao Willian leh striker Marc Guiu te an la lut tawh.

Blues hian goalkeeper Mike Penders chu KRC Genk aṭangin an la lut dawn bawk a, kum 19 mi keeper manah hian Belgian club nen hian £17mtd-in an inrem tawh - Chelsea senior keeper pariatna tur a ni dawn a, season khat chu Genk-ah hian loan-in a khel leh phawt ang.

Hetihrual hian Blues hian Ian Maatsen, Lewis Hall leh Omari Hutchinson hralhna aṭangin £90mtd an hmu tawh a, Conor Gallagher chu Atletico Madrid-in £33mtd-in an lei dawn bawk a, player lakluh nana an insen nual rualin sum lakluh an nei nual bawk.

London club hian Atletico Madrid forward Samu Omorodion chu £34.5mtd-in lakluh tumin inremna neihpui tawh mah se, inbiakna a tlawlh niin khawthlang media-te chuan an tarlang a, Blues hian Omorodion hi an lakluh loh a rinawm tawh zawk.

Felix lam hawiin

Chelsea hian an striker, season hnih zet loan-a chhuak tawh Romelu Lukaku chu chhuahtir an tum bawk a, Napoli boss Antonio Conte-a'n a duh avangin Napoli striker Victor Osimhen la lut tura Italian club hmin nan hman an tum.

Blues hian Osimhen hi tlarhmaa an duh ber chu niin a lang a, ani bakah hian Atletico Madrid forward Joao Felix an rim bawk - Blues leh Atletico hi tun nipui chu an indawr tawn chhen dawn niin a lang!

Kum 24 mi Felix hian 2022-23 season chawhnu lam kha Chelsea-ah hian loan-in a lo khel tawh a, match 20-ah goal li a khungsak. Blues hian a ngheta lakluh theihna dan nei mah se, hetihlaia coach thar Mauricio Pochettino chuan mamawh a inti lo.

Poch a chhuak a, Omorodion an la thei lo bawk nen, Blues hian Felix lam bawk an hawi. Season hmasa kha Barcelona-ah loan-in a khel a, match 44-ah goal 10 khungin, assist vawi ruk a nei.