Paris 2024 titi lengvak atam

Khawvel huapa thil lian leh langsar a nih tawh chuan sawiselna leh fakna thu a tam tawh ṭhin. Paris Olympic 2024 ngei pawh faktu an tam rualin na tak taka sawiseltu pawh an tam, a bik takin a hawnna hun chuan sawi zui a hlawh nasa.

Khawthlang chanchinbu tam tak zingah, "Olympic awm tawh azawnga a hawnna hun chhe ber a ni," tia sawi pawh an awm. A hnuaiah hian Paris 2024 chhunga mite sawi hlawh zual panga tarlan a ni.

1. A hawnna hunin sawi zui a hlawh nghal - Olympic dangte chu stadium chhungah hawn ṭhin a ni, tun ṭumah erawh pawnah tih a ni thung. Seine River-a hun hmanah hian Isua leh a zirtirte zanriah hnuhnung “The Last Supper” tihbawrhbanna lam hawi a tel a, hei hian sawi zui a hlawhin a thlengtu lamin thupha an chawi a ngai hial.

2. South Korea leh North Korea hming lam pawlh a ni! South Korean infiammiten a hnam puanzar nen Olympic hawnna hun an hman laiin thupuangtu lamin “Democratic Republic of Korea” an ti, hei hi North Korea sawina zawk a ni, a hnuah ngaihdam an dil a ngai bawk.

3. Algerian boxer Imane Khelif chungchangin sawi a hlawh hle. Hmeichhia a ni lo, tia sawiseltu an tam - tun hmain hmeichhia dik tak a ni lo nia ngaiin World Championship a khelh an phal lo tawh, tun ṭumah erawh sawiselna karah a tel phalsak niin, a tawpah gold medal a hnek chhuak a ni.

4. Tui bawlhhlawh chu buaina lian tak a tling. An lui chhuanvawr leh hmingthang Seine chu a thianghlim tawk lo a, hei vang hian inelna a khaihlak nasa. Belgium phei chu an team zinga mi Claire Michel a damloh avangin mixed team relay aṭangin an inhnukdawk hial.

5. Mipa 100m intlansiak hi khawvelin a ngaihven ṭhin. Paris Olympic tihmuhnawmtu pawh a ni. American tlangval Noah Lyles chuan second 9.79 chhungin a tlan thleng, amah hnaih bertu Kishane Thompson aia a thlen hmasakna kha second khat hmun sangngaa ṭhen sawm chumi pakhat ang lek chu a ni.