Sinner hnehtu Rublev

Canadian Open khelh laiah champion tura rinkai, world number 1 ni bawk Jannik Sinner chu Andrey Rublev lakah 6-3, 1-6, 6-2 a chak loin quarterfinal-ah a zinkawng a tawp.

Italian tlangval Sinner hi a khel bawr dinglam hliam vangin a buai deuh, inelna hmachhawn tluan thei mah se a ṭhat dan berin a khel chhuak lo. Tun season atana Grand Slam hnuhnung ber tur US Open atan dam hman tumin a bei dang.

Hnehna changtu Rublev chuan, "Jannik hi player ṭha bik a ni a, tun hnai season hnih chhung a khelh dan phei chu a ṭha takzet. Ani ang player ṭha ka paltlang thei hi chanchin lawmawm a ni," a ti.

Russian tlangval Rublev hian a match lehpekah chuan Matteo Arnaldi a hmachhawn ang. Quarterfinal inkhel dangah Arnaldi hian a khingpui Japanese tlangval Kei Nishikori chu 6-4, 7-5 in a lo hneh ve thung.