Barca captain Roberto a chhuak

Hansi Flick hnuaia indinthar tum Barcelona chuan captain Sergi Roberto chhuah thu an puang a, kum 32 mi midfielder hian June thla khan a contract hmang zoin, Flick-a'n chhawr a tum zingah a tel lo.

Spain tana vawi 11 inlana goal khat khungtu Roberto hi Barca academy hmingthang La Masia aṭanga inzir chhuak niin, club dang tan a la khel ngai lo a, Catalan club tan hian match 373 zet khelin goal 19 a khung a, assist vawi 43 a nei.

Roberto hi midfielder ni mah se, position hrang hranga chhawr theih player a ni a, right back-ah a khel hnem hle. Barca tana a goal khung zingah, kum 2017 Champions League last 16-a Paris St-Germain laka 6-5 a an chakna goal a khung chu hriatreng tawh tur a ni.

Barca tan La Liga (7), Copa del Rey (6), Supercopa de Espana (3), UEFA Champions League (2), UEFA Super Cup leh FIFA Club World Cup nomawi a chawi a, Barca chuan, "Kil tina a khelh theihna chu Barca tan a ṭangkai ṭhin hle," tiin an club captain chu an thlah.