An inbuatsaih danah Arteta a lungawi

Arsenal manager Mikel Arteta chuan Premier League season thar atan an inbuatsaih danah a lungawi tih a sawi a, an match hnuhnung bera Lyon an hneh chu an tan fiahna a ni tih a sawi bawk.

Pathianni zan khan Gunners hian Emirates Cup an khel a, an khingpui Ligue 1 club Lyon chu 2-0 in an hneh. North London club goal pahnih hi defender William Saliba leh Gabriel te khung a ni.

Arteta chuan, "Kan tan chuan fiahna ṭha tak a ni a, season thar inbuatsaihna pumpui kan thlir chuan a ṭha tawk hleah ka ngai. Kan khingpuiten theihtawp min chhuahpui ṭhin, chu chuan keini tan pawh thil ṭha a thlentir.

"Tun ṭuma Lyon nen kan inkhel bik pawh kha thlir ila, a awlsam lo hle - a bik takin second half kha a harsa. Mahse, ka naute hian an khelh dan phung an bel tawh a, chu chuan rah ṭha a chhuah," a ti.

Arsenal tan hian nipui bazara an lei, defender thar Riccardo Calafiori pawh a inlan. Italy international chungchang sawiin Arteta chuan, "Min ṭan tute khan an lo lawm khawp mai a, hriat a nuamin hmuh pawh a nuam.

"Kan squad min tichak zual thei tur a ni a, ani hian tlarhnung lamah hna min thawhpui dawn a ni," a ti. Tlarhnung lai leh a sira hman theih a ni a, mamawh huna chhawr kual theih a nihna hi an ṭangkaipui ang.

Gunners hian Manchetser City lak aṭangin Premier League nomawi chhuhsak ngei an tum a, kawng awlsam erawh a ni dawn lo. Season thar EPL an match hmasa ber atan August 17, Inrinni zan hian Emirates Stadium-ah Wolves an mikhual dawn a ni.