Vardy-a'n contract pawtsei

Leicester City striker Jamie Vardy chuan contract thar a ziak a, season hnih daih contract a la neih lai a pawhsei avangin Foxes tan hian kum 2023 nipui thleng a khel chhunzawm dawn tihna a ni.

Kum 33 mi Vardy hian 2012 khan Foxes hi a zawm a, khawvel barakhaihin Premier League nomawi a chawipui tawh. A contract hi a hmang zo a nih chuan King Power Stadium-ah season 11 a hmang ang.

England international striker hlui Vardy chuan, "Leicester City tana ka khel chhunzawm zel thei tur hi ka lawm. King Power Stadium chhunga fan-te hmaa inkhelh hi nuam ka ti takzet.

"Team ṭha tak kan indin mek zel a, hmalam panin kan kal zel ang. Nakin lawkah eng ang dinhmun nge kan thlen theih dawn hi hriat a châkawm tawh hle a ni," tiin a sawi. Vardy hi a kum tam deuh tawh mah se khelmual chhungah a la hlauhawm hle, season liam ta khan league goal 23 a khung a, ani aia khung hnem an awm lo. Arsenal leh club dang aṭangin sawmna duhawm dawng ṭhin mah se Foxes tan a rinawm zel.

Leicester City hian season hmasa kha an hmang ṭha hle, mahse season chawhnu lamah erawh an zuih - a bik takin coronavirus vanga an chawlh hnuah an talbuai zual. Champions League khel phak ngei tura ngaih khan an khel phak dawn lo. Amaherawhchu Europa League erawh an khel dawn, an midfielder pahnih James Maddison leh Nampalys Mendy ten contract an ziah thar tawh bawk avangin beisei an nei sang ang.