Real Betis-ah Montoya a kir

Brighton & Hove Albion defender Martin Montoya  chu a lo khelh tawh ṭhinna Real Betis lamah a kir a, Spanish club tan hian kum li chhung khel turin contract a ziak. 

Kum 29 mi Montoya hian kum 2018 khan Valencia aṭangin Premier League club hi a zawm a, season hnih a khelh chhungin inelna hrang hrangah match 56-a khelhsak hman a ni. Barcelona youth system chhuak defender hian Barca senior team tan pawh match 67 khel ve hmanin goal hnih a khungsak a, Barca aṭang hian Inter Milan leh Real Betis-ah te loan-in a khel. 

Betis tan hian 2015-16 season kha loan-a a khelh hnuin kum 2016 khan Valencia a pan a, Spanish club aṭang hian Brighton-a pan leh a ni. Brighton head coach Graham Potter chuan, "Season hnih chhung khan Martin hian Premier League-a kan inhamtan theih nan tha a thawhhlawk hle a ni. Club aiawhin a hma hun atan duhsakna sang ber kan hlan a ni," tiin an defender hi a thlah.