Champions League khel lo tur Celtic

Scottish champion Celtic-in season tharah Champions League an khel dawn lo. Neil Lennon-a naute hian second qualifying round-ah Ferencvaros chu 2-1 in an ngam lo a, kum 15 chhunga Champions League qualifier-a an tlak hma ber a ni. 

Glasgow khawpuia inkhelah Hungarian club tan David Siger chuan minute sarihna lekah goal hmahruai a khung a, Scottish club tan Ryan Christie chuan minute 53-naah an si phurh hi a sut. 

Mahse, Celtic lawm chhung a rei lo. Mikhual team Ferencvaros-in Champions League khelh ngei an tum tih pholangin minute 75-naah an khung leh a, goal hi Tokmac Nguen khung a ni. 

Celtic-in hnehna an chan zawh loh avangin Europa League group stage khelh phak chu an tum tur a ni dawn a, Champions League qualifier second round-a an tlawm avang hian Europa League third qualifying round an khel ve leh ang. 

Scottish champion-in mahni mualah hnehna an chang zo lo a, Champions League group stage inpetkai ngei an tum laiin qualifier second round-ah an tla - Celtic boss Neil Lennon a lungawi thei lo. 

Lennon chuan, "Nikuma kan tihsualna ngaiah bawk kan tawlh thlu leh a ni. Kan goal chhuah hmasak zawkah kha chuan thiam kan inchan thei a ni mai thei a, mahse goal hnihna lehzel kha chu sawi mawi theih a ni lo. 

"Kan rilru puthmang dik loh nge kan huaisen tawk lo, ka hrethiam lo a, mawhphurhna erawh ka la ang," a ti a, "He hmunah hian in awm duh lo a nih chuan haw mai rawh u tiin ka hrilh ang," tiin a naute a hauh dan tur a sawi bawk!