Hriatthiam har Southampton

Inrinni zan Premier League inkhelah Southampton chuan khual mualah West Brom chu 1-0 in an hneh lo. Beisei phak baka season bul ṭan ṭha Saints hi tunlai hian an talbuai deuh a, kum tawpah eng dinhmun nge an thlen dawn hriatthiam a har rih hle.

Inkhel thunun tak chung siin Southampton-in minute 90 chhung goal an khung thei lo a, inkhelh ṭan aṭanga minute hnihna leka Saido Berahino goal thun chu inkhela goal awm chhun a ni.

Goal a luh hnu hian Sadio Mane leh Maya Yoshida ten an si phurh sutna hun ṭha an hmu nghal a, mah se goal zawnah an pet thei lo ve ve. Inkhel tawp thlengin Saints hian West Brom tlar hnung an su hawng zo lo a ni.

Goal awmchhun hi West Brom striker Berahino thun a ni a, ani hian tun season-ah a club tan goal 17 a thun tawh. Berahino hian Premier League-ah an home-ah goal kua a thun tawh. Ani aia khung tam awmchhun chu Chelsea striker Diego Costa a ni a, Stamford Bridge-ah goal 10 a khung tawh.

Saints hian League match 27 khelh tawhah point 46 hmuin table-ah pangana an ni mek a, an khingpui West Brom hian match khelh inzatah point 30 hmu tawhin table-ah 13-na an ni mek thung.

Southampton hian an match hnuhnung pathumah goal an khung tawh lo a, West Brom an hneh loh hma hian Premier League-ah tho West Ham United leh Liverpool lakah goal an lo khung lo tawh bawk. Ronald Koeman-a naute hian minute 270 chhung goal an khung tawh lo.

West Brom manager Tony Pulis chuan, "Berahino goal khung kha a class a sang hle a, goal class sang tak khung turin theihna a nei reng a ni. He hmuna ka lo kal tirh aṭang khan a thiamna leh theihna hi ka hmu nghal a ni," tiin goal khungtu Berahino chu a fak.

Pulis chuan sawi chhunzawmin, "Kan khingpuite kha team ṭha tak an ni a, second half-ah phei kha chuan kan mangang hman hle a ni. Point thum kan hlawhchhuak thei hi ka lawm takzet. Kuminah hian point 40 kan hmu tling thei a nih chuan season tharah Premier League kan khelh chhun zawm ngei ang," tiin a sawi.

Southampton manager Ronald Koeman chuan, "Kan khingpui te khan chak duhna thinlung an pu a, chu chu an khelh danah pawh a lang, point thum hmuh kha an phu zawk a ni. West Brom khan an khel ṭha tak zet a bik takin goal khung tu Berahino kha a khel ṭha hle. Thawhlehniah Crystal Palace kan hmachhawn dawn a, point thum kan hmuh tawh ngei ka beisei," tiin an khingpui te chu a fak.

Inkhel dang result

West Ham 1 - 3 Crystal Palace

Burnley 0 - 1 Swansea

Man United 2 - 0 Sunderland

Newcastle 1 - 0 Aston Villa

Stoke City 1 - 0 Hull City