Milan chak zo lo
Italian Serie A inkhelah Inrinni zan khan AC Milan leh an khingpui Chievo te chu goal lut loin an inhnehtawk.
Chievo khelmual Stadio Marcantonio Bentegod-a inkhelah hian Milan tan Daniele Bonera, chuan hun ṭha ṭum hnih a bawhpelh bakah Keisuke Honda chuan goal a khung teuh hle a cross bar a pet per. Chievo lam tan Ervin Zukanovic leh Alberto Paloschi ten hun ṭha an nei a, mahse goal-ah an chantir thei bik lo.
Filippo Inzaghi naute hian League game an khelh hnuhnung 11-ah ṭum hnih chauh hnehna an chang a, point 34 hmu tawhin table-ah pakuana an ni mek. Champions League khel turin table-a pathumna Lazio an phak lohna chu point 11 lai a ni tawh.
Ṭum 18 zet Italy champion lo ni tawh Milan leh Chievo te hi vawi 18-in hmachhawn tawhin Milan hian vawi 16 ngawt an hneh tawh a, mah se tun ṭumah erawh an chak zo ta bik lo a ni.
Milan coach Inzaghi chuan, "Goal kan chhuah lo a hei hi chanchinṭha a ni. Amaherawhchu goal kan thun thei lo erawh chanchin lawmawm loh a ni. Chievo khan an goal ven kha hnapui berah an nei a, kan tan a harsa a ni. Kan khelh leh turah chuan chak ngei kan tum ang," tiin a sawi.