Point hloh a thiang tawh lo - Sherwood

Season thara Premier League khel chhunzawm leh tur chuan an game khelh hmabak 11 la awmah point an hmuh zel a ngai tawh thu Aston Villa manager Tim Sherwood chuan a sawi.

Aston Villa hian In­rinni zan khan Newcastle chu Papiss Cisse goal khat thun hmangin an hneh lo. Newcastle manager John Carver-a'n a team-te St. James Park-a a chak puina hmasa ber ni a, kum 2015-a an khelmuala an chakna hmasa ber a ni.

Sherwood hian Paul Lambert thlakin February khan Aston Villa manager hna hi a thawk ṭan a, a match hmasa pahnihah point a hlawhchhuak zo lo ve ve. A game hmasa berah Stoke City hneh loin Newcastle an hneh lo zui lehnghal. An game khelh leh hmasak ber tur chu March 3-ah Villa Park-ah West Brom an lo mikhual ang.

Premier League match 27 khelh tawhah point 22 hmu tawhin table-ah 19-na an ni mek a, an hnuaiah hian Leicester chauh awmin anni hian match 26 khel tawhin point 18 an nei thung.

Villa manager Share­wood chuan, "Tunah hian boruak rit takin min delh mek a, heta ṭanga talchhuak tur chuan point kan hmuh a ngai a ni. Kan theihna tak tak hi kan pho chhuah a hun tawh hle. Premier League-a cham zel turin kan theih tawp kan chhuah chhun zawm zel ang," a ti.