MCL Thlirlawkna Zemabawk Pitchers leh Zarkawt Lords
Mizorama Cricket inelna ngaihhlut Mapuia Cricket League (MCL) 2015, vawi thumna chu March 3 aṭangin Suaka Cricket Ground, Sihhmuiah khelh a ni dawn.
MCL khel tur team paruk zingah Armed Veng Cricket Club, Chaltlang Sporting Club, Chanmarians Cricket Club leh Ramhlun Venglai Cricket Club te kan thlir lawk tawh a, tun ṭumah hian Zarkawt Lords Cricket Club leh Zemabawk Pitchers Cricket Club te bihchianna kan nei ang.
Zarkawt Lords Cricket Club
Mizoram cricket inelnaa team hlun berte zinga mi hi tun season-ah an tlahniam hret a, league lamah point khat chiahin relegation zone aṭangin an him. League lama an chet dan en chuan MCL lamah pawh team ngaihtuahawm pawl an ni tura ngaih a nih laiin January transfer kawngkhar inhawn chhungin MCL hre rengin player talent nei ṭha tak tak eng emaw zat an lalut.
Zarkawt Lords hian January transfer kawngkhar inhawn chhunga an player lak luhte la duhtawk loin MCL player auction-ah an team tichak thei tur player eng emaw zah an lak luh belh leh a, tunah chuan MCL hmachhawn turin an inpeih thawkhatah an inngai tawh ang. Division league lama an chak lohna an hria a, insiamṭha turin hun pawh an nei a, insiamṭhat tumin ṭan pawh an laa Lords team thar kan hmu angem? Player auction-ah player pali lak luh nan Rs. 12900 an seng.
Auction-a an player leite
Parvez Ahmed (Kulikawn CC) Rs. 7000; Lalhlimpuia (Bawngkawn South CC) Rs. 2300; Ricky Lallawmkima (Kulikawn CC) Rs. 2000; Lalnunpuia (Lily CC) Rs.1600.
Zemabawk Pitchers
Cricket Club
Tun season aṭangin he team hi 1st division an ni ve chiah a, 1st division-a an season vawikhatnaah MCL khel turin an tling nghal.
Hetiang hi MCL chanchinah a la thleng ngai lo a, Zemabawk Pitchers hian tun season MCL khelh hma hauhin MCL record thar pakhat an siam nghal pang.
Mimala ṭha vur sawi tur nei lo ber team an ni hial mai thei a, mahse team anga an thawh hona ṭha tak hi an chak pui leh mai ṭhin. Tun season Mahuma Memorial Tournament-ah pawh team nem pawl tura ngaih an nih laiin league a zawh meuh chuan palina dinhmun an luah thei a, hei vang hian team nam nul mai mai theih an ni bik lo tih a lang chiang hle. MCL hre rengin January transfer kawngkhar inhawn chhungin an mamawh player an lalut nual bawk a, rin kai ber an ni lo chung hian team tawh khirh pawl tak an ni lo ang tih a sawi theih loh.
Auction-a an player leite
Lalnuntluanga (Chhinga Veng CC) Rs. 4000; Bishnu Bhandari (Gorkha CC) Rs. 2000